Live Updates

صائم ایوب نے بابر اعظم کا ناپسندیدہ ریکارڈ برابر کردیا

ٹی ٹونٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں کی فہرست میں تیسرے نمبر پر آگئے

ذیشان مہتاب پیر 15 ستمبر 2025 11:40

صائم ایوب نے بابر اعظم کا ناپسندیدہ ریکارڈ برابر کردیا

دبئی (اردو پوائنٹ تازہ ترین اخبار ۔ 15 ستمبر 2025ء ) ایشیا کپ ٹی ٹونٹی 2025 میں پاک بھارت ہائی وولٹیج میچ میں پاکستانی کے اوپنر صائم ایوب نے ایک ناپسندیدہ ریکارڈ اپنے نام کر لیا۔

صائم ایوب اننگز کا آغاز کرنے آئے تو بھارتی آل راؤنڈر ہاردک پانڈیا کی بال پر جیسپریت بمراہ کو آسان کیچ دے بیٹھے اور یوں پہلی ہی گیند پر آؤٹ ہو گئے۔

صائم ایوب ٹی ٹونٹی انٹرنیشنل میں 7 ویں مرتبہ صفر پر آؤٹ ہوئے ہیں جس کے بعد وہ ٹی ٹونٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں کی فہرست میں تیسرے نمبر پر آگئے۔

ٹی ٹونٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں میں بابر اعظم، محمد حفیظ اور کامران اکمل بھی تیسرے نمبر ہیں۔

(جاری ہے)

اس فہرست میں سب سے آگے مڈل آرڈر بیٹر عمر اکمل ہیں جو 84 میچز میں 10 مرتبہ بغیر رن بنائے آؤٹ ہوئے۔

ان کے بعد شاہد آفریدی کا نام آتا ہے جو 98 میچز میں 8 بار صفر پر آؤٹ ہوئے۔

7 مرتبہ صفر پر آؤٹ ہونے والوں میں صائم ایوب (43 میچز)، کامران اکمل (58 میچز)، محمد حفیظ (119 میچز) اور بابر اعظم (128 میچز) شامل ہیں۔

صائم کے صفر پر آؤٹ ہونے سے پاکستان کی بیٹنگ مشکلات کا شکار رہی اور ٹیم مقررہ 20 اوورز میں 9 وکٹوں کے نقصان پر صرف 127 رنز ہی بنا سکی۔

انڈیا نے پاکستان کے دیے گئے 128 رنز کے ہدف کے جواب میں 3 وکٹوں کے نقصان پر 15.5 میں 131 رنز بنائے۔ سوریا کمار یادوو 47 رنز جب کہ ابھیشیک شرما 31 رنز بنا کر دوسرے نمایاں بلے باز رہے، صائم ایوب قومی ٹیم کے واحد بولر تھے جنہوں نے تین وکٹیں حاصل کیں۔

پاکستان کے اوپنر اور مڈل آرڈر ایک بار پھر ناکام رہے اور تاہم صاحبزادہ فرحان کے چالیس اور شاہین کے 33 رنز کیوجہ سے مجموعی سکور 127 تک پہنچا تھا۔

اس کے علاوہ قومی ٹیم کے پانچ اہم کھلاڑی ڈبل فیگرمیں بھی داخل نہ ہوسکے جبکہ فخر زمان 17، فہیم اشرف 11 اور صفیان مقیم 10 رنز بناسکے۔

بھارت کی جانب سے کلدیپ یادوو نے چار اوورز میں 18 رنز دے کر تین، جبکہ اکشر پٹیل اور بمراہ نے 2،2 اور ہاردک پانڈیا، ورون چکرورتی نے ایک ایک وکٹ اپنے نام کی۔