Live Updates

پاکستان نے بھارتی ٹیم اور میچ ریفری کے نامناسب رویے پر باقاعدہ احتجاج ریکارڈ کروا دیا

بھارتی کھلاڑیوں کا ہاتھ نہ ملانا سپورٹس مین سپرٹ کے خلاف ، یہ پاکستان کرکٹ ٹیم کے لئے ایک چیلنج تھا، منیجر پاکستانی ٹیم نوید اکرم چیمہ

ذیشان مہتاب پیر 15 ستمبر 2025 10:07

پاکستان نے بھارتی ٹیم اور میچ ریفری کے نامناسب رویے پر باقاعدہ احتجاج ..

دبئی (اردو پوائنٹ تازہ ترین اخبار ۔ 15 ستمبر 2025ء ) پاکستان کرکٹ بورڈ (پی سی بی) کے مطابق منیجر نوید اکرم چیمہ نے میچ ریفری کے رویے پر باقاعدہ احتجاج ریکارڈ کروا دیا جب کہ ٹیم مینجر کی جانب سے بھی کہا گیا کہ بھارتی کھلاڑیوں کا ہاتھ نہ ملانا اسپورٹس مین اسپرٹ کے خلاف ہے۔

ذرائع کا کہنا ہے کہ بھارٹی ٹیم اور میچ ریفری اینڈی پائی کرافٹ کے نا مناسب رویے کے بعد پاکستانی ٹیم کے منیجرنوید اکرم چیمہ میچ ریفری کے پاس گئے اور ان سے کہا کہ یہ میچ اسپرٹ کےخلاف ہے۔

اس حوالے سے ذرائع نے دعویٰ کیا کہ میچ ریفری نے پاکستانی ٹیم منیجر سے جواب میں کہا کہ ان سے اس طرح کرنے کی درخواست کی گئی تھی۔

کپتان سلمان علی آغا نے بھی بھارتی رویے کے خلاف اختتامی تقریب میں احتجاجاً شرکت نہیں کی، اس حوالے سے ذرائع نے دعویٰ کیا کہ اختتامی تقریب میں نہ جانے کی وجہ یہ تھی کہ تقریب کے پریزنٹیٹرکا تعلق بھارت سے تھا۔

(جاری ہے)

قومی ٹیم کے ہیڈ کوچ مائیک ہیسن نے کہا کہ بھارتی ٹیم نے جو حرکت کی اس پر پاکستانی رد عمل فطری تھا۔

ترجمان پاکستان ٹیم کے مطابق ٹاس کےوقت میچ ریفری نے کپتانوں سے ہاتھ نہ ملانے کی درخواست کی تھی، میچ ریفری اینڈی پائی کرافٹ کا تعلق زمبابوے سے ہے۔

یاد رہے کہ ایشیا کپ 2025ء میں دبئی میں پاکستان اور بھارت کے درمیان کھیلے جانیوالے میچ کے اختتام پر بھی بھارتی ٹیم نے سپورٹس مین شپ کیخلاف عمل کرتے ہوئے پاکستانی کھلاڑیوں سے مصافحہ نہ کیا۔

اس سے قبل ٹاس کے وقت بھی اسپورٹس مین شپ کو نظر انداز کیا گیا تھا جب دونوں کپتانوں نے مصافحے سے گریز کیا۔

شائقین کرکٹ نے اس واقعے پر مختلف آراء کا اظہار کیا ہے۔

بعض نے اسے دونوں ٹیموں کے درمیان بڑھتی ہوئی کرکٹ حریفانہ کشیدگی کی عکاسی قرار دیا جبکہ کچھ نے اسے محض ایک اتفاق کہا۔