وفاقی وزیر داخلہ اور وزیر ریلویز کی زیر صدارت اجلاس ، اسلام آباد، راولپنڈی کے درمیان تیز رفتار ریل سروس شروع کرنے کا فیصلہ

پیر 15 ستمبر 2025 22:57

اسلام آباد (اُردو پوائنٹ اخبارتازہ ترین - این این آئی۔ 15 ستمبر2025ء)جڑواں شہروں کے درمیان عوام کو جدید اور تیز رفتار سفری سہولت فراہم کرنے کے لیے اسلام آباد اور راولپنڈی کے درمیان ریل سروس شروع کرنے کا فیصلہ کیا گیا ہے جس کا آغاز مارگلہ ریلوے اسٹیشن اسلام آباد سے راولپنڈی صدر اسٹیشن تک ہوگا۔ اس منصوبے کے تحت شہری صرف 20 منٹ میں دونوں شہروں کے درمیان سفر طے کر سکیں گے، جس سے وقت اور ایندھن کی نمایاں بچت ہوگی اور شاہراہوں پر ٹریفک کے دباؤ میں بھی کمی آئے گی۔

وفاقی وزیر داخلہ محسن نقوی اور وزیر ریلویز حنیف عباسی کی زیر صدارت اہم اجلاس میں منصوبے پر فوری پیش رفت کا فیصلہ کیا گیا۔ اجلاس میں وزیر مملکت برائے داخلہ طلال چوہدری سمیت اعلیٰ حکام نے شرکت کی۔

(جاری ہے)

اجلاس میں اس بات پر اتفاق کیا گیا کہ ریل سروس کا آغاز مارگلہ ریلوے اسٹیشن اسلام آباد سے راولپنڈی صدر اسٹیشن تک کیا جائے گا، منصوبے کے فریم ورک ایگریمنٹ کو آئندہ ہفتے حتمی شکل دے کر اس پر دستخط کیے جائیں گے۔

فیصلے کے مطابق منصوبے کے لیے ٹریک پاکستان ریلوے فراہم کرے گی جبکہ ریل سروس کا انتظام کپیٹل ڈویلپمنٹ اتھارٹی (سی ڈی ای) کے پاس ہوگا۔ اجلاس میں ریل سروس کے لیے جدید ٹرین درآمد کرنے پر بھی اتفاق کیا گیا۔وزیر ریلویز حنیف عباسی نے کہا کہ یہ منصوبہ جڑواں شہروں کے عوام کے لیے انقلابی سہولت ہوگا، جس کے ذریعے شہری تیز، محفوظ اور کم وقت میں سفر کر سکیں گے۔

وزیر داخلہ محسن نقوی نے کہا کہ یہ منصوبہ وزیراعظم محمد شہباز شریف کے عوامی ریلیف کے وڑن کا عکاس ہے، جس کی تکمیل سے ہزاروں شہریوں کو معیاری اور سستی سفری سہولت میسر آئے گی۔وزیر مملکت طلال چوہدری نے کہا کہ ٹرین سروس شہریوں کے لیے کم خرچ اور تیز رفتار سفری سہولت ہوگی اور اس سے سڑکوں پر ٹریفک کا دباؤ بھی کم ہوگا۔اجلاس میں وفاقی سیکرٹری داخلہ، سیکرٹری ریلویز، چیئرمین سی ڈی اے، کمشنر راولپنڈی، کمانڈنٹ و ڈپٹی کمانڈنٹ ایف سی، آئی جی اسلام آباد پولیس، ڈپٹی کمشنر اسلام آباد اور دیگر اعلیٰ حکام نے بھی شرکت کی۔