وزیراعظم شہباز شریف اور سعودی ولی عہد کی ملاقات (آج)طے

خطے کی سلامتی صورت حال اور اسرائیلی جارحیت پر بھی مشاورت ہو گی،ذرائع

منگل 16 ستمبر 2025 19:55

اسلام آباد(اُردو پوائنٹ اخبارتازہ ترین - این این آئی۔ 16 ستمبر2025ء)وزیراعظم شہباز شریف (آج)بدھ کو سعودی ولی عہد محمد بن سلمان سے ملاقات کریں گے،دو طرفہ تعلقات اور اسرائیلی جارحیت کے تناظر میں ملاقات کو انتہائی اہمیت کا حامل سمجھا جا رہا ہے۔ذرائع کے مطابق وزیراعظم پاکستان اور سعودی ولی عہد کی ملاقات طے پا گئی۔ ذرائع کے مطابق وزیراعظم شہباز شریف اعلیٰ سطح وفد کے ساتھ آج بدھ کی سہ پہر سرکاری دورے پر ریاض پہنچیں گے۔

(جاری ہے)

نائب وزیراعظم اسحاق ڈار ،سینئر وزراء اور اعلیٰ حکام بھی ساتھ ہوں گے۔وزیراعظم شہباز شریف اور پرنس محمد بن سلمان کی ملاقات شام کے وقت متوقع ہے۔پاک سعودی تعلقات کے تناظر میں ملاقات انتہائی اہمیت کی حامل ہے۔ ملاقات میں خطے کی سلامتی صورت حال اور اسرائیلی جارحیت پر بھی مشاورت ہو گی۔ذرائع کے مطابق سعودی عرب کی متعلقہ اہم شخصیات ولی عہد محمد بن سلمان کی معاونت کریں گی۔ وزیراعظم شہباز شریف سعودی عرب سے ہی دورہ برطانیہ پر روانہ ہوں گے۔ دورہ برطانیہ کے بعد وزیراعظم اقوام متحدہ کی جنرل اسمبلی سے خطاب کیلئے نیویارک جائیں گے۔