پاور ڈویژن نے بارشوں اور سیلاب سے متاثرہ علاقوں میں بجلی بحالی پر 18 ستمبر تک کی رپورٹ جاری کر دی

اسلام آباد (اُردو پوائنٹ اخبارتازہ ترین - اے پی پی۔ 18 ستمبر2025ء) پاور ڈویژن نے بارشوں اور سیلاب سے متاثرہ علاقوں میں بجلی بحالی پر 18 ستمبر تک کی رپورٹ جاری کر دی۔ جمعرات کو جاری رپورٹ کے مطابق مجموعی طور پر 51 گرڈ اور 572 فیڈرز متاثر ہوئے، 337 فیڈر مکمل اور 228 جزوی طور پر بحال کر دیئے گئے ہیں۔ فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے، متاثرہ فیڈرز میں 45 مکمل اور 36 کو جزوی طور پر بحال کر دیا گیا ۔

فیسکو کے 52153 متاثرہ صارفین کیلئے بجلی کی بحالی کا کام 18 سے 19 ستمبر تک مکمل کرنے کی توقع ہے۔ لیسکو کے 67 متاثرہ فیڈرز میں سے 66 مکمل اور 1 جزوی طور پر بحال ہوچکے ہیں، لیسکو کے 441 متاثرہ صارفین کیلئے بجلی کی بحالی کا کام 19 ستمبر تک مکمل کرنے کی توقع ہے۔

(جاری ہے)

لیسکو کے زیرِ انتظام علاقے لاہور، ننکانہ، شیخوپورہ اور اوکاڑہ میں بجلی کی بحالی کا کام مکمل کر لیا گیا ہے۔

میپکو کے 181 متاثرہ فیڈرز میں سے 17 مکمل اور 157 کو جزوی طور پر بحال کر دیا گیا ہے۔ میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔ اسی طرح گیپکوکے کے 11 گرڈز اور 103فیڈرزمتاثر ہوئے ، متاثرہ فیڈرز میں سے 101 فیڈرز مکمل اور 2 جزوی طور پر بحال ہوچکے ہیں، گیپکو کے 327 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔

پیسکو کے 88 فیڈرز مکمل اور 3 جزوی طور پر بحال کردئیے گئے ہیں، پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔ رپورٹ کے مطابق ٹیسکو کے علاقے شمالی وزیرستان اور خیبر کے 18 فیڈرز متاثر ہوئے، ٹیسکو کے 17 فیڈر مکمل اور 1 فیڈر جزوی طور پر بحال کر دیئے گئے ہیں۔ ٹیسکو کے 996 متاثرہ صارفین کیلئے بجلی کی بحالی کا کام تقریباََ 18 ستمبر تک مکمل ہونے کی توقع ہے جبکہ ٹیسکو کے علاقے خیبر میں بجلی کی بحالی کا کام مکمل کرلیا گیا ہے۔

مزید برآں ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال کر دیئے گئے ہیں جبکہ سیپکو کے زیرِ انتظام علاقے کے 23 متاثرہ فیڈر عارضی طور پر بحال کر دیئے گئے ہیں۔ ترجمان پاور ڈویژن کے مطابق بارشوں اور سیلاب سے متاثرہ علاقوں میں بجلی کی مکمل بحالی اولین ترجیح ہے۔