رینجرزسندھ اور پولیس کی مشترکہ کارروائی، مغوی کانسٹیبل بحفاظت بازیاب، تین ڈکیت ہلاک

پیر 22 ستمبر 2025 17:16

کراچی (اُردو پوائنٹ اخبارتازہ ترین - اے پی پی۔ 22 ستمبر2025ء) پاکستان رینجرز (سندھ) اور پولیس کی اندرون سندھ کچے کے علاقے میں ڈکیتوں اور جرائم پیشہ افراد کے خلاف کارروائیاں جاری ہیں۔پیر کو ترجمان سندھ رینجرز کے مطابق پاکستان رینجرزسندھ اورپولیس نے ضلع کشمور کے علاقے پولیس اسٹیشن درانی مہر میں اغوا برائے تاوان میں ملوث خادم بھیو ڈکیت گینگ کے خلاف مشترکہ کارروائی کرتے ہوئے پولیس کانسٹیبل صفدر محمد کو بازیاب کروا لیاہے۔

20 ستمبر 2025 کو بدنام زمانہ خادم بھیو ڈکیت گروہ نے پولیس پکٹ قمبرانی لاڑو سے پولیس کانسٹیبل صفدر محمد کو دوران ڈیوٹی اغوا کیا تھا ،خادم بھیو ڈکیت گروہ کی جانب سے مذکورہ پولیس کانسٹیبل کی ویڈیو بھی سوشل میڈیا پر وائرل کی گئی۔ رینجرز سندھ اور پولیس نے مشترکہ لائحہ عمل ترتیب دیتے ہوئے اغوا برائے تاوان میں ملوث گینگ کے خلاف کارروائی کی اور پولیس کانسٹیبل صفدر محمد کو بازیاب کروا لیا۔

(جاری ہے)

دوران کارروائی فائرنگ کے تبادلے میں بدنام زمانہ بھیو گینگ کے 3ملزمان صحبت جاگیرانی (ہیڈ منی 5لاکھ روپے مقرر)، شاہد بھیو اور شفیق دھانی ہلاک ہو گئے جبکہ بدنام زمانہ خادم بھیو (ہیڈ منی 10 لاکھ روپے مقرر)، واجد بھیو، مالک جاگیرانی سمیت 9 ملزمان زخمی ہو گئے۔ دوران کارروائی ڈکیت گروہ کے ٹھکانے کو بھی مسمار کر دیا گیا۔رینجرز نے عوام سے اپیل کی ہے کہ وہ ڈاکوئوں کو پناہ دینے والے عناصر اور دیگر بااثر افراد کی نشاندہی کریں اور سندھ کو جرائم پیشہ افراد سے پاک کرنے میں سندھ رینجرز کی مدد کے لیے رینجرز ہیلپ لائن 1101یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے فوری اطلاع دیں۔اطلاع دینے والے کا نام صیغہ راز میں رکھا جائے گا۔