Live Updates

پی ٹی آئی سیاسی نہیں بلکہ فسادی جماعت ہے، ان کے پاس عوام کیلئے کوئی پروگرام نہیں

پنجاب کوئی امداد نہیں لے گا بلکہ سیلاب متاثرین کی مدد اپنے وسائل سے کریگا، سندھ کو آثارِ قدیمہ بنانے والے پنجاب کو مشورے نہ دیں، وزیر اطلاعات پنجاب عظمیٰ بخاری

ثنااللہ ناگرہ منگل 23 ستمبر 2025 18:45

پی ٹی آئی سیاسی نہیں بلکہ فسادی جماعت ہے، ان کے پاس عوام کیلئے کوئی ..

لاہور ( اردوپوائنٹ اخبار تازہ ترین۔ انٹرنیشنل پریس ایجنسی۔ 23 ستمبر 2025ء ) وزیر اطلاعات و ثقافت پنجاب عظمیٰ بخاری نے کہا ہے کہ تحریک انصاف سیاست نہیں بلکہ فساد کی جماعت ہے، ان کے پاس عوام کے لیے کوئی پروگرام نہیں، صرف سیلابی سیاست ہے۔ دوسری جانب وزیر اعلیٰ پنجاب مریم نواز اور ان کی ٹیم سیلاب کے ہر محاذ پر عوام کے ساتھ کھڑی ہے۔پنجاب کا کوئی ایسا علاقہ نہیں جہاں سیلاب آیا ہو اور وزیر اعلیٰ خود نہ پہنچی ہوں۔

وزیر اعلیٰ نے مزدوروں کی طرح متاثرین کے درمیان بیٹھ کر ان کے دکھ درد سنے، یہ ایک نئے طرز حکمرانی کی جھلک ہے۔عظمیٰ بخاری نے بتایا کہ سیلاب سے 47 لاکھ سے زائد افراد متاثر ہوئے ہیں، جن میں 26 لاکھ براہِ راست اور 21 لاکھ مویشی شامل ہیں۔ تین دریاؤں کے کنارے کے علاقوں سمیت 27 اضلاع اور 4 ہزار 794 دیہات متاثر ہوئے۔

(جاری ہے)

ریلیف اور ریسکیو آپریشن کے لیے 2 ہزار 213 ٹیمیں فیلڈ میں کام کر رہی ہیں۔

انہوں نے کہا کہ متاثرہ کاشتکاروں کو 20 ہزار روپے فی ایکڑ معاوضہ دیا جا رہا ہے، جبکہ گھروں کے متاثرین کو 10 لاکھ روپے مکمل نقصان اور 5 لاکھ جزوی نقصان پر دیا جائے گا۔ گائے اور بھینس کے ضیاع پر بھی 5 لاکھ روپے معاوضہ فراہم کیا جا رہا ہے۔ یہ تمام رقوم پنجاب حکومت کے اپنے وسائل سے دی جا رہی ہیں، کسی سے مدد نہیں مانگی گئی۔ان خیالات کا اظہار انہوں نے ڈی جی پی آر میں میڈیا سے گفتگو کرتے ہوئے کیا۔

ان کا کہنا تھا کہ ''اپنی چھت اپنا گھر'' پروگرام کے تحت 80 ہزار گھر زیر تعمیر ہیں اور دسمبر تک ان کی تعداد ایک لاکھ تک پہنچ جائے گی۔ مزید برآں، متاثرین کے لیے ''ریلیف کارڈ'' متعارف کروایا جا رہا ہے تاکہ کسی کو لائنوں میں کھڑا نہ ہونا پڑے۔ وفاقی حکومت اور این ڈی ایم اے کے تعاون کو سراہتے ہوئے عظمیٰ بخاری نے کہا کہ چیئرمین بلاول بھٹو اور چیئرمین سینیٹ یوسف رضا گیلانی نے بھی وزیر اعلیٰ پنجاب کی کاوشوں کو سراہا۔

انہوں نے کہا کہ پاکستان کا سعودی عرب کے ساتھ سکیورٹی معاہدہ قومی وقار کی علامت ہے، مگر اس پر بے بنیاد تنقید افسوسناک ہے۔ صوبائی وزیر اطلاعات نے کہا کہ پنجاب حکومت نہ صرف سیلابی چیلنجز سے نبرد آزما ہے بلکہ ماحولیاتی مسائل خصوصاً اسموگ سے نمٹنے کے لیے بھی بھرپور اقدامات کر رہی ہے۔ انہوں نے کہا کہ بھارتی پنجاب میں فصلیں جلانے سے ہمارا انڈیکس بھی متاثر ہوتا ہے، مگر پنجاب حکومت عملی اقدامات پر یقین رکھتی ہے۔