چودھری ظہورالٰہی شہید نے ہمیشہ ظلم کے خلاف آواز بلند کرنے اور عوام کو عزت کی نگاہ سے دیکھنے کا درس دیا‘ چودھری پرویزالٰہی

لاہور (اُردو پوائنٹ اخبارتازہ ترین - این این آئی۔ 25 ستمبر2025ء)مرکزی صدر پاکستان تحریک انصاف و سابق وزیراعلیٰ پنجاب چودھری پرویزالٰہی نے چودھری ظہور الٰہی شہید کی 44ویں برسی کے موقع پر اپنے پیغام میں کہا ہے کہ چودھری ظہورالٰہی شہید نے ہمیشہ ظلم کے خلاف آواز بلند کی اور عوام کو عزت کی نگاہ سے دیکھا، آج بھی گجرات سمیت پاکستان بھر میں ان کیلئے دعائوں اور اظہار عقیدت کا سلسلہ جاری و ساری ہے، قیصرہ الٰہی، مونس الٰہی، ثمیرہ الٰہی اور راسخ الٰہی مل کر چودھری ظہورالٰہی شہید کے مشن کو آگے بڑھا رہے ہیں یہی وجہ ہے کہ عوام سے ہماری محبت میں مزید اضافہ ہو رہا ہے۔

انہوں نے کہا کہ چودھری ظہور الٰہی شہید نے ہمیں ہمیشہ یہی تعلیم دی کہ جو حق پر ہو اس کے ساتھ ڈٹ کر کھڑے رہنا ہے اور ظلم کے خلاف آواز اٹھانی ہے، چودھری ظہور الٰہی شہید کے اصولوں پر چلتے ہوئے ہم آج بھی ان کی رواداری اور عوام سے محبت کا اصل حق ادا کر رہے ہیں، گجرات کے عوام سے ہمارا سیاسی نہیں بلکہ ذاتی تعلق ہے، وہ سب ہمارے اپنے خاندان کی طرح ہیں۔

(جاری ہے)

قبل ازیں محترمہ ثمیرہ الٰہی نے چودھری ظہورالٰہی شہید کی 44 ویں برسی کے موقع پر ان کے ایصال ثواب کیلئے چودھری ظہورالٰہی ہائوس گجرات میں فاتحہ خوانی اور دعا کا اہتمام کیا جس میں ضلع بھر سے معززین سمیت تمام مکتبہ فکر کے لوگوں اور کارکنوں نے شرکت کی۔ محترمہ ثمیرہ الٰہی نے کہا کہ چودھری ظہورالٰہی شہید چاروں صوبوں کی آواز تھے، انہوں نے ساری زندگی حق گوئی کے ساتھ گزاری اور ہمیشہ مظلوم طبقات کے حقوق کیلئے جدوجہد کی جس کی وجہ سے آج بھی لوگ ان کے ساتھ محبت و عقیدت رکھتے ہیں۔

انہوں نے کہا کہ انشاء اللہ چودھری ظہورالٰہی شہید کی طرح عوام کیلئے ہمارے گھر کے دروازے ہمیشہ کھلے رہیں گے، یہی چودھری ظہورالٰہی شہید کی سیاست کا محور تھا جس پر ہم قائم رہیں گے۔ چودھری ظہورالٰہی شہید کی برسی کی تقریب میں سابق ایم پی اے صفیہ جاوید چودھری، امجد پرویز بٹ، چودھری فخر ندیم، فیضان خالد بٹ، امتیاز احمد راٹھور، قاضی مبشر ایڈووکیٹ، عمران کمبوہ جانباز، قاری عارف شاہد گوندل، ظفر غوری، ابوذر ڈار، ابراہیم نجیب چیمہ، راجہ تصدق حسین، چودھری اعجاز چک بھولا، چودھری عابد پوربہ، راجہ افضل ننھا پہلوان، مشتاق سرور غوری، لعل حسین، ملک ظہیر آف گلانوالہ، چودھری الطاف ایڈووکیٹ، زبیدہ احسان چودھری، صالح انجم، نزہت اشرف گوندل اور دیگر رہنما شریک تھے۔#