عظمیٰ بخاری فیک ویڈیو کیس،پی ٹی آئی کارکن فلک جاوید کا 5 روزہ جسمانی ریمانڈ منظور

عدالت نے آئندہ سماعت پر این سی سی آئی اے سے فلک جاوید سے ہونے والی تفتیش کی رپورٹ طلب کر لی

جمعرات 25 ستمبر 2025 19:30

لاہور (اُردو پوائنٹ اخبارتازہ ترین - این این آئی۔ 25 ستمبر2025ء)ضلع کچہری لاہور نے عظمیٰ بخاری فیک ویڈیو کیس میں پاکستان تحریک انصاف کی سوشل میڈیا کارکن فلک جاوید خان کو 5 روزہ جسمانی ریمانڈ پر نیشنل سائبر کرائم انویسٹی گیشن ایجنسی (این سی سی آئی ای) کے حوالے کردیا۔واضح رہے کہ گزشتہ روز این سی سی آئی اے نے پی ٹی آئی کی سوشل میڈیا کارکن فلک جاوید کو وزیر اطلاعات پنجاب عظمیٰ بخاری کی فیک ویڈیوز کے معاملے میں گرفتار کیا تھا۔

نیشنل سائبر کرائم انوسٹی گیشن ایجنسی نے فلک جاوید کو عدالت میں پیش کر دیا، ان کی جانب سے بیرسٹر میاں علی اشفاق عدالت میں پیش ہوئے۔این سی سی آئی اے کی جانب سے سوشل میڈیا ایکٹوسٹ فلک جاوید کے جسمانی ریمانڈ کی درخواست پر سماعت جوڈیشل مجسٹریٹ نعیم وٹو کی عدالت میں ہوئی۔

(جاری ہے)

فلک جاوید کے وکیل میاں علی اشفاق نے دلائل دیتے ہوئے کہا کہ این سی سی آئی اے خود ہی شکایت کنندہ ہے، خود ہی انوسٹی گیشن کررہی ہے۔

انہوں نے مؤقف اپنایا کہ عظمی بخاری کے مقدمے میں کئی سوشل میڈیا کے اکاؤنٹس کو مقدمے میں لکھا گیا۔این سی سی آئی اے نے فلک جاوید کا 30 دن کا جسمانی ریمانڈ مانگ لیا، وکیل نیشنل سائبر کرائم انویسٹی گیشن ایجنسی نے عدالت کو بتایا کہ ملزمہ اشتہاری ہیں، ہم نے ملزمہ کی گرفتاری کے لیے 36 ریڈ کیے۔سرکاری وکیل نے کہا کہ ملزمہ کے والد اور والدہ آئے، شامل تفتیش ہو کر چلے گئے اور ملزمہ کو پیش نہ کیا، ملزمہ کی رہائش پر ریڈ کیا تو یہ روپوش ہو گئیں۔

وکیل این سی سی آئی اے نے مزید کہا کہ ملزمہ کا موبائل چاہیے کہ فورنزک کیا جا سکے۔عدالت نے ملزمہ فلک جاوید کو پانچ روزہ جسمانی ریمانڈ پر این سی سی آئی اے کے حوالے کر دیا۔عدالت نے آئندہ سماعت پر این سی سی آئی اے سے فلک جاوید سے ہونے والی تفتیش کی رپورٹ طلب کر لی۔