پنجاب میں پاکستان کا پہلاجدید ترین ٹیکنالوجی سے لیس ایئرکوالٹی فورکاسٹ سسٹم تیار کر لیا گیا ہے،صوبائی وزیرمریم اورنگزیب

ہفتہ 27 ستمبر 2025 22:49

لاہور (اُردو پوائنٹ اخبارتازہ ترین - اے پی پی۔ 27 ستمبر2025ء) وزیراعلی مریم نواز کی ہدایت پر پنجاب میں پاکستان کا پہلاجدید ترین ٹیکنالوجی سے لیس ایئرکوالٹی فورکاسٹ سسٹم تیار کر لیا گیا ہے، جدید ترین نظام پنجاب بھر میں موسمی حالات اور فضائی آلودگی کی پیشگوئی کرے گا۔لاہور، فیصل آباد سمیت پنجاب کے بڑے شہروں میں آلودگی کم کرنے میں مدد ملے گی، فضائی آلودگی سے متعلق ہفتہ وار رپورٹ جاری ہوگی -سینئر صوبائی وزیر مریم اورنگزیب نے اپنے بیان میں کہاکہ ایئر فورکاسٹنگ سسٹم ریئل ٹائم مانیٹرنگ اور جدید سائنسی ماڈلز کا امتزاج ہے،جدید نظام''ونڈی'', ''یورو'' جیسے انٹرنیشنل ماڈلز، عالمی فضائی انڈیکس اور مقامی ضروریات کے مطابق کام کرتا ہے-سینئر صوبائی وزیر نے کہاکہ ائیر کوالٹی فورکاسٹنگ سسٹم میں رواں سال لگائے گئے جدید مانیٹرنگ اسٹیشنز کا ڈیٹا بھی شامل ہوگا، پنجاب میں 41 جدید ایئر کوالٹی مانیٹرنگ اسٹیشنز لگائے جا چکے ہیں ، آئندہ دنوں میں ان سٹیشنز کی تعداد سو (100) تک بڑھائیں گے،جدید نظام شہریوں کو صحت کی حفاظتی اور احتیاطی تدابیر بھی بتائے گا ، خود کار نظام فضائی آلودگی کی مقدار ناپے گا اور موسمی حالات کی تبدیلی کا ریکارڈ مرتب کرے گا۔

(جاری ہے)

وزیراعلی کے وژن کی بدولت یہ جدید نظام سائنسی بنیادوں پر مبنی پالیسی سازی میں مددگار کرے گا۔ سینئر صوبائی وزیر نے سیکریٹری ماحولیات سلوت سعید، ڈی جی عمران حامد شیخ اور ای پی اے ٹیم کو ایئر فورکاسٹنگ ماڈل کی تیاری پر سراہا- انہوں نے کہاکہ یہ نظام پنجاب میں سموگ کے خاتمے کے حکومتی پلان کا حصہ ہے-فصلوں کی باقیات جلانے پر کریک ڈاون بھی اس نظام کا حصہ ہے۔ انہوں نے کہاکہ جدید آلات کے ذریعے فضائی آلودگی کی سطح، موسمی حالات اور شہری علاقوں کی ہوا کے معیار کی مسلسل نگرانی کی جائے گی، گاڑیوں اور صنعتی دھوئیں پر قابو پانے کے اقدامات جاری ہیں ،ماحولیاتی آلودگی پر قابو پانے کے لیے ہر شہری کو کردار ادا کرنا ہوگا،شہری سموگ سیزن کے دوران غیر ضروری گھروں سے نہ نکلیں ۔