پاک سعودی عسکری معاہدمسلم امہ کے لیے خوش آئندہے،ساجد حسین جعفری

کراچی(اُردو پوائنٹ اخبارتازہ ترین - این این آئی۔ 28 ستمبر2025ء)پاک فوج زندہ باد موومنٹ کی جانب سے عید میلاد النبی ﷺ کے حوالے سے ایک پروقار کانفرنس کا انعقاد کیا گیا، جس میں مختلف سیاسی، سماجی اور مذہبی شخصیات نے شرکت کی۔ یہ کانفرنس ملک میں اتحاد و یکجہتی کی فضا پیدا کرنے کے ساتھ ساتھ ملکی مسائل پر گفتگو کا ایک اہم فورم ثابت ہوئی۔کانفرنس کی صدارت ساجد حسین جعفری چیئرمین پاک فوج زندہ باد موومنٹ نے کی، جبکہ اس میں بلال لاشاری (وائس چیئرمین)، سیدہ سنبل اختر (انفارمیشن سیکریٹری)، داؤد فخری (جنرل سیکریٹری کراچی ڈویژن)،ملک الطاف حسین (نائب صدر) اورشہیراللہ (آفس سیکریٹری) سمیت دیگر اہم شخصیات نے شرکت کی۔

اس موقع پر، تمام شرکاء نے اپنے خیالات کا اظہار کیا اور مختلف مسائل پر تبادلہ خیال کیا۔

(جاری ہے)

کانفرنس کے دوران،ساجد حسین جعفری نے اپنے خطاب میں پاک سعودی عسکری معاہدے کو خوش آئند قرار دیتے ہوئے اس کی اہمیت پر روشنی ڈالی۔ انہوں نے کہا کہ یہ معاہدہ فیلڈ مارشل جنرل سید عاصم منیر کی قیادت کا نتیجہ ہے، جو دونوں ممالک کے دفاعی تعلقات کو مزید مستحکم کرنے میں معاون ثابت ہوگا۔

ان کا کہنا تھا کہ اس معاہدے کی بدولت دونوں ممالک کے مابین تعاون میں مزید اضافہ ہوگا، جو عالمی سطح پر ایک اہم پیغام دے گا۔ساجد حسین جعفری نے اپنے خطاب میں فلسطین اور مقبوضہ کشمیر کے عوام کے حوالے سے بھی شدید غم و غصے کا اظہار کیا۔ انہوں نے کہا کہ فلسطین میں جاری اسرائیلی مظالم اور کشمیر میں بھارتی ظلم و جبر کے خلاف عالمی برادری کو فوری اقدامات کرنا ہوں گے۔

ان کا کہنا تھا کہ ہم فلسطینی عوام کے ساتھ ہیں اور دعا گو ہیں کہ اللہ تعالیٰ انہیں جلد آزادی عطا فرمائے۔ انہوں نے کشمیری عوام کے حق میں بھی آواز بلند کی اور کہا کہ وہ دن دور نہیں جب کشمیری بھی آزادی کا سورج دیکھیں گے۔کانفرنس کے دوران، ساجد حسین جعفری نے ملک میں حالیہ سیلاب زدگان کی فوری امداد اور بحالی کے لیے بھی اپیل کی۔ انہوں نے کہا کہ سیلاب متاثرین کی امداد نہ صرف حکومت بلکہ پوری قوم کی مشترکہ ذمہ داری ہے۔

ان کا کہنا تھا کہ ہم سب کو مل کر اس قدرتی آفت سے متاثرہ افراد کی مدد کرنی ہوگی تاکہ وہ جلد اپنے پاؤں پر کھڑے ہو سکیں۔کانفرنس کے دوران، چیئرپرسن عالیہ نے بھی خطاب کیا اور حضور اکرم ﷺ کی سیرتِ طیبہ پر روشنی ڈالی۔ انہوں نے فرمایا کہ حضرت محمد ﷺ کی زندگی مسلمانوں کے لیے ایک مکمل رہنمائی ہے اور ان کی تعلیمات پر عمل پیرا ہو کر ہم اپنی زندگیوں کو بہتر بنا سکتے ہیں۔

انہوں نے سیرتِ طیبہ کو ایک جامع ضابطہ حیات قرار دیتے ہوئے کہا کہ ہمارے لیے حضرت محمد ﷺ کی سیرت سب سے بڑی تعلیم ہے، جس میں انسانیت، محبت اور امن کا پیغام چھپا ہوا ہے۔کانفرنس میں شریک دیگر اہم شخصیات میں طاہر علی حبیب، حافظ سید منظر امام، سعدی جمال شاہ، فیصل ایف ڈی، علامہ مرزا، عالم امتیاز قریشی، انجینئر غلام مصطفی، شاہد ہاشمی،پاکستان کنزرویٹو پارٹی کے چیئرمین دانش چنا شامل تھے۔

ان شخصیات نے اپنے خطابات میں پاک فوج کی خدمات، وطن کی سلامتی اور مسلمانوں کے عالمی مسائل پر بات کی۔ انہوں نے اس بات پر زور دیا کہ مسلمان ملکوں کو متحد ہو کر اپنی سیاسی، اقتصادی اور دفاعی پوزیشن کو مضبوط کرنا ہوگا۔اس کانفرنس کا اختتام ایک روشن پیغام کے ساتھ ہوا، جس میں شرکاء نے نہ صرف عید میلاد النبی ﷺ کی خوشی منائی بلکہ اپنے عزم کا اعادہ کیا کہ وہ ملک کے دفاع، امن اور سلامتی کے لیے متحد رہیں گے۔

اس کانفرنس نے ایک بار پھر اس بات کو واضح کر دیا کہ ہم سب کو اپنے ملک کے مسائل پر توجہ دینی ہوگی اور عالمی سطح پر پاکستانی قوم کا کردار مضبوط بنانا ہوگا۔یہ کانفرنس نہ صرف اس لحاظ سے اہمیت کی حامل تھی کہ اس میں مختلف سیاسی و سماجی شخصیات نے شریک ہو کر اہم مسائل پر گفتگو کی، بلکہ اس نے یہ بھی ثابت کیا کہ مسلمان قوم کو اپنے مسائل کے حل کے لیے ایک پلیٹ فارم پر جمع ہونے کی ضرورت ہے۔