پائیدار ترقی کے اہداف کے حصول میں ہمت نہیں ہاریں گے، امینہ محمد

اسلام آباد (اُردو پوائنٹ ۔ UN اردو۔ 29 ستمبر 2025ء) اقوام متحدہ کی نائب سیکرٹری جنرل امینہ محمد نے کہا ہے کہ پائیدار ترقی کے اہداف (ایس ڈی جی) کے حصول کی مقررہ مدت میں صرف پانچ سال باقی ہیں لیکن اس سمت میں دنیا کی رفتار سست ہے جبکہ مقصد کو پانے کے لیے ابھی بہت سا کام باقی ہے۔

اقوام متحدہ کی 80ویں جنرل اسمبلی کے موقع پر نیویارک میں منعقدہ گلوبل سٹیزن فیسٹیول میں شرکا سے خطاب کرتے ہوئے انہوں نے کہا کہ 'ایس ڈی جی' کرہ ارض اور اس پر بسنے والے تمام انسانوں کے لیے منصفانہ مستقبل کا نقشہ ہیں۔

اس موقع پر انہوں نے انصاف کے لیے آواز بلند کرنے اور بہتر دنیا کی تعمیر کے لیے جدوجہد ترک نہ کرنے پر شرکا کا شکریہ ادا کیا۔

(جاری ہے)

4.3 ٹریلین ڈالر کی ضرورت

جنرل اسمبلی کے اعلیٰ سطح ہفتے کے اختتام پر نیویارک کے سنٹرل پارک میں منعقدہ موسیقی کا یہ میلہ 'گلوبل سٹیزن' نے منعقد کیا جو دنیا بھر میں انتہائی درجے کی غربت کے خاتمے کی سب سے بڑی تحریک ہے۔ اس میلے شاکیرا، کارڈی بی اور روزے جیسی عالمی شہرت یافتہ گلوکاراؤں نے فن کا مظاہرہ کیا۔

2015 میں اقوام متحدہ کے سابق سیکرٹری جنرل بان کی مون کی خصوصی مشیر کی حیثیت سے امینہ محمد نے پائیدار ترقی کے اہداف کی منظوری اور رکن ممالک کے درمیان اتفاق رائے قائم کرنے میں کلیدی کردار ادا کیا تھا۔

فیسٹیول میں خطاب کرتے ہوئے انہوں نے واضح کیا کہ ان اہداف کو حاصل کرنے اور ترقی کی راہ پر سبھی کو ساتھ لے کر چلنے کے لیے ہر سال 4.3 ٹریلین ڈالر درکار ہیں۔

'امن کو موقع دیا جائے'

امینہ محمد نے کہا کہ اصل اہمیت اس بات کی ہے کہ امن کو ایک موقع دیاجائے، سوڈان کی خواتین کے لیے، غزہ کے بچوں کے لیے اور یوکرین کے لوگوں کے لیے۔ ہر جگہ لوگوں کو امن کی ضرورت ہے۔

انہوں نے مطالبہ کیا کہ دنیا کو ایسے اقدامات درکار ہیں کہ مصنوعی ذہانت معاشرتی فاصلے پیدا نہ کرے، خواتین کو ہر اس جگہ نمائندگی دی جائے جہاں فیصلے کیے جاتے ہیں، معیاری تعلیم کو فروغ ملے اور ایمازون سے کانگو تک ہر جگہ زمین کو تحفظ دیا جائے۔

انہوں نے حاضرین پر زور دیا کہ وہ ایسی جگہ مسائل کے حل تلاش کریں جہاں دوسروں کو راستے بند نظر آتے ہیں اور اپنی آواز سے کام لیں تاکہ شور کے بیچ واضح پیغام دیا جا سکے۔

گلوبل سٹیزن فیسٹیول

سنٹرل پارک میں گریٹ لان پر منعقدہ اس فیسٹیول میں 60,000 افراد نے شرکت کی۔

اس موقع پر 25ملین ہیکٹر پر پھیلے ایمازون کے جنگلات کو تحفظ دینے کے لیے 280 ملین ڈالر کے وعدے کیے گئے۔

فیفا گلوبل سٹیزن ایجوکیشن فنڈ کے ذریعے دنیا بھر کے 200 سے زیادہ علاقوں میں بچوں کو تعلیم اور کھیلوں تک رسائی فراہم کرنے اور افریقہ بھر میں 4.6 ملین گھروں کو صاف توانائی مہیا کرنے کے لیے 30 ملین ڈالر سے رقم جمع کی گئی۔