آئی ایم ایف نے پاکستان سے کیپیسٹی چارجز میں کمی کیلئے تجاویز مانگ لیں

آئی ایم ایف وفد (آج) وزیر خزانہ اور صوبائی حکومتوں سے مذاکرات کرے گا،ذرائع پاکستانی حکام کی آئی ایم ایف مشن کو پاور ڈویژن حکام کی توانائی شعبے میں اصلاحات پر بریفنگ ،گردشی قرض 6سال کے مقررہ ہدف سے پہلے ختم کرنے کی یقین دہانی

اتوار 28 ستمبر 2025 20:50

اسلام آباد(اُردو پوائنٹ اخبارتازہ ترین - این این آئی۔ 28 ستمبر2025ء)آئی ایم ایف نے پاکستان سے کیپیسٹی چارجز میں کمی کیلئے تجاویز مانگ لیں۔ذرائع کے مطابق پاکستان اور انٹرنیشنل مانیٹری فنڈز (آئی ایم ایف)کے دوسرے اقتصادی جائزہ مذاکرات جاری ہیں۔آئی ایم ایف نے توانائی کے شعبے میں گردشی قرض کا ان فلو جلد ختم کرنے کا مطالبہ کرتے ہوئے لاسز اور بجلی چوری روکنے کا پلان اور کیپسٹی چارجز میں کمی کی تجاویز مانگ لیں۔

ذرائع کے مطابق آئی ایم ایف وفد (آج)پیر کو وزیر خزانہ اور صوبائی حکومتوں سے مذاکرات کرے گا۔پاکستانی حکام نے آئی ایم ایف مشن کو پاور ڈویژن حکام کی توانائی شعبے میں اصلاحات پر بریفنگ دیتے ہوئے گردشی قرض 6سال کے مقررہ ہدف سے پہلے ہی ختم کرنے کی یقین دہانی کروا دی۔

(جاری ہے)

بریفنگ میں بتایا گیا کہ گردشی قرض کے خاتمے کیلئے بینکوں سے 1225ارب روپے کے قرض کا معاہدہ طے پاگیا ہے، قرض معاہدے سے صارفین پر کوئی نیا بوجھ نہیں آئے گا، ادائیگیاں پہلے سے عائد 3روپے 23پیسے فی یونٹ سرچارج سے کی جائیں گی، اضافی بجلی صنعتی شعبے اور کرپٹو مائننگ میں استعمال کی جائے گی۔

ذرائع کے مطابق بریفنگ میں بتایا گیا کہ معاہدے سے گردشی قرض کے بہا میں کمی، مالی ڈسپلن، سرمایہ کاروں کا اعتماد بڑھے گا، قرض معاہدے سے صارفین پر کوئی نیا بوجھ نہیں آئے گا، ادائیگیاں پہلے سے لگے 3.23روپے فی یونٹ سرچارج سے ہوں گی، نقصانات 635ارب کے تخمینے کے مقابلے 397ارب پر آ گئے ہیں۔عالمی مالیاتی ادارے نے ڈسکوز کی گورننس بہتر بنانے کیلئے اصلاحات تیز کرنے کا بھی مطالبہ کر دیا۔

ذرائع کے مطابق آئی ایم ایف کو نجی پاور پلانٹس کے ساتھ مذاکرات میں پیشرفت سے آگاہ کیا گیا، اضافی بجلی صنعتی شعبے اور کرپٹو مائننگ میں استعمال کی جائے گی۔آئی ایم ایف کو 3منافع بخش ڈسکوز کی نجکاری پر پیشرفت پر بریفنگ دی گئی، نقصان میں چلنے والی کمپنیوں کا انتظامی کنٹرول نجی شعبے کے حوالے کرنے کے پلان سے آگاہ کیا گیا۔