مشرقِ وسطیٰ میں امن کیلئے بڑی پیشرفت ہوئی ہے، ٹرمپ کا دعویٰ

جنگ کے خاتمے کے قریب ہیں، جلد بڑا معاہدہ متوقع ہے، ہم کچھ بہت خاص کرنے جا رہے ہیں؛ امریکی صدر

ساجد علی اتوار 28 ستمبر 2025 19:45

مشرقِ وسطیٰ میں امن کیلئے بڑی پیشرفت ہوئی ہے، ٹرمپ کا دعویٰ

۔واشنگٹن (اُردو پوائنٹ اخبارتازہ ترین۔ 28 ستمبر2025ء) امریکی صدر ڈونلڈ ٹرمپ نے مشرقِ وسطیٰ میں امن کے حوالے سے اہم پیشرفت کی نوید سنادی۔ اس حوالے سے جاری کردہ اپنے ایک بیان میں انہوں نے کہا کہ ہم کچھ بہت خاص کرنے جا رہے ہیں، جنگ کے خاتمے کے قریب ہیں، جلد بڑا معاہدہ متوقع ہے اور اس بار سب اس پر متفق ہیں، ایسا پہلی بار ہو رہا ہے، جس کی وجہ سے ہمارے پاس مشرقِ وسطیٰ میں عظمت حاصل کرنے کا ایک حقیقی موقع ہے اور پہلی بار سب ایک صفحے پر ہیں، ہم یہ کرکے رہیں گے۔

(جاری ہے)

بتایا جارہا ہے کہ امریکی صدر کا یہ بیان ایک ایسے وقت سامنے آیا ہے جب چند روز قبل ہی صدر ٹرمپ کا کہنا تھا کہ غزہ جنگ کے خاتمے کے قریب ہیں اور جلد ایک بڑا معاہدہ طے پانے والا ہے‘، اگرچہ صدر ٹرمپ نے کوئی مخصوص ٹائم لائن یا تفصیلات فراہم نہیں کیں، تاہم ان کے تازہ بیانات نے عالمی سیاسی و سفارتی حلقوں میں ایک نئی بحث کو جنم دے دیا ہے۔ امریکی حکام کہتے ہیں کہ پیر کے روز ٹرمپ کی وائٹ ہاؤس میں اسرائیلی وزیرِاعظم بنیامین نیتن یاہو سے ملاقات متوقع ہے، جس میں ایک ممکنہ امن معاہدے کے فریم ورک پر اتفاق رائے کے لیے بات چیت کی جائے گی۔