صدر ٹرمپ سے ملاقات کے بعد پاک امریکہ تعلقات میں مزید مضبوطی آئے گی، وزیراعظم

عسکری، معاشی، سفارتی محاذ پر پاکستان کو بڑی کامیابیاں ملیں، ہم نے جنگ جیت کر دشمن کو شکست فاش دی، مشترکہ کاوشوں سے آج ہماری معیشیت مستحکم ہورہی ہے؛ برطانیہ میں پاکستانیوں سے خطاب

ساجد علی اتوار 28 ستمبر 2025 18:51

صدر ٹرمپ سے ملاقات کے بعد پاک امریکہ تعلقات میں مزید مضبوطی آئے گی، ..

لندن ( اُردو پوائنٹ اخبارتازہ ترین۔ 28 ستمبر2025ء ) وزیراعظم شہباز شریف کا کہنا ہے کہ امریکی صدر ڈونلڈ ٹرمپ سے واشنگٹن میں ملاقات انتہائی مفید رہی، پاکستان اور امریکہ کے تعلقات میں بہتری آئی ہے، اچھے ماحول میں ہونے والی اس میٹنگ سے پاکستان اور امریکہ کے تعلقات میں مزید مضبوطی آئے گی، مسلم ممالک سربراہان کے ساتھ بھی غزہ کے مسئلے پر امریکی صدر ڈونلڈ ٹرمپ سے میٹنگ ہوئی تھی، امید ہے اس حوالے سے جلد حوصلہ افزا نتائج سامنے آئیں گے۔

برطانیہ میں سمندر پار پاکستانیوں سے خطاب کرتے ہوئے انہوں نے کہا کہ اوورسیز پاکستانی ہمارا قیمتی سرمایہ ہیں، اوورسیز پاکستانی ملک کا نام روشن کررہے ہیں، سمندر پار پاکستانی اپنے اپنے دائرے میں ملک کی خدمت کر رہے ہیں، آپ لوگ پاکستان کے ایمبیسیڈرز ہیں، ملکی معیشت کی بہتری میں بیرون ملک مقیم پاکستانیوں کا کردار اہم ہے، ملکی معیشت درست سمت میں گامزن ہے، 2 سے 3 سال قبل پاکستان کی معیشت ہچکولے کھا رہی تھی، مشترکہ کاوشوں سے آج ہماری معیشیت مستحکم ہورہی ہے۔

(جاری ہے)

شہباز شریف کہتے ہیں کہ معشیت کی ترقی کا وقت آچکا ہے، معاشی استحکام بہترین ٹیم ورک کا نتیجہ ہے، ٹیم ورک کے بغیر کوئی کامیابی حاصل نہیں کی جا سکتی، عسکری، معاشی، سفارتی محاذ پر پاکستان کو بڑی کامیابیاں ملیں، پاکستان خارجی محاذ، عسکری اور معاشی میدان میں آگے بڑھ رہا ہے، پاکستان کی عزت اور توقیر میں اضافہ ہوا، ہم نے جنگ جیت کر دشمن کو شکست فاش دی، اللہ تعالیٰ نے پاکستان کی شان و شوکت میں اضافہ کیا۔

ان کا کہنا ہے کہ اقوام متحدہ کے اجلاس میں اپنی تقریر کے دوران 24 کروڑ پاکستانیوں کے جذبات کی عکاسی کی، کشمیر کا مقدمہ بھی اقوام متحدہ میں لڑا، اقوام متحدہ کے اجلاس میں پاکستان کا مقدمہ بہترین انداز میں پیش کیا، غزہ اور کشمیر کے مقدمے کو دنیا کے سامنے بہترین انداز میں اجاگر کیا، غزہ میں 64 ہزار سے زائد بے گناہ فلسطینی بچوں، نوجوان، بزرگوں اور خواتین کو شہید کیا گیا، غزہ میں ظلم کا خاتمہ اور جلد امن قائم ہونا چاہیے، ایسا ظلم ہم نے پہلے کبھی نہیں دیکھا، دعا ہے غزہ میں جلد از جلد اس ظلم کا خاتمہ ہو۔