اسلام آباد میں ٹیکس ادا نہ کی گئی گاڑیوں کی رجسٹریشن منسوخ کرنے کا فیصلہ

رجسٹریشن کی بحالی صرف واجبات اور بھاری جرمانے کی ادائیگی کے بعد ہی ممکن ہوگی؛ محکمہ ایکسائز اینڈ ٹیکسیشن

ساجد علی پیر 29 ستمبر 2025 14:51

اسلام آباد میں ٹیکس ادا نہ کی گئی گاڑیوں کی رجسٹریشن منسوخ کرنے کا فیصلہ

اسلام آباد ( اُردو پوائنٹ اخبارتازہ ترین۔ 29 ستمبر2025ء ) وفاقی دارالحکومت اسلام آباد میں ٹیکس ادا نہ کی گئی گاڑیوں کی رجسٹریشن عارضی طور پر منسوخ کرنے کا فیصلہ کرلیا گیا۔ میڈیا رپورٹس کے مطابق محکمہ ایکسائز اینڈ ٹیکسیشن نے اسلام آباد میں رجسٹرد ایسی تمام گاڑیوں کی رجسٹریشن 10 اکتوبر تک منسوخ کرنے کا فیصلہ کیا ہے جن کے ٹیکس ادا نہیں کیے گئے، 30 جون 2025ء تک جن مالکان کے ٹیکس بقایا تھے انہیں ریڈ نوٹس جاری کر دیئے گئے ، ان کی رجسٹریشن پہلے ہی معطل کی جا چکی ہے۔

اس ضمن میں محکمہ ایکسائز اینڈ ٹیکسیشن کا کہنا ہے کہ اگر مقررہ تاریخ تک واجبات ادا نہ کیے گئے تو ان کی گاڑیوں کی رجسٹریشن مستقل طور پر منسوخ کر دی جائے گی، رجسٹریشن کی بحالی صرف واجبات اور بھاری جرمانے کی ادائیگی کے بعد ہی ممکن ہوگی، ٹیکس دہندگان کی سہولت کے لیے خصوصی کاؤنٹر قائم کیے گئے ہیں۔

(جاری ہے)

بتایا جارہا ہے کہ اسلام آباد ٹریفک پولیس نے بھی 8 اکتوبر سے ڈرائیونگ لائسنس قوانین پر سختی سے عمل درآمد کرنے کا فیصلہ کیا ہے، بغیر لائسنس ڈرائیوروں کو گرفتار کرکے مقدمات درج ہوں گے اور گاڑیاں قبضے میں لے لی جائیں گی، یہ حکم نامہ سرکاری اور نجی دونوں ڈرائیوروں پر یکساں طور پر لاگو ہوگا، انسپکٹر جنرل پولیس علی ناصر رضوی نے افسران کو ہدایت دی ہے کہ کریک ڈاؤن پر مکمل عمل درآمد یقینی بنایا جائے، بغیر لائسنس ڈرائیور اور ان کی گاڑیاں دونوں پولیس کی تحویل میں لی جائیں گی۔

دوسری طرف ملک میں ٹیکس نیٹ سے باہر یا کم ٹیکس دینے والے جیولرز کیخلاف کارروائی کا فیصلہ کرلیا گیا، ذرائع کا کہنا ہے کا اس حوالے سے 60 ہزار جیولرز کا ڈیٹا جمع کیا گیا جن میں سے صرف 21 ہزار جیولرز ایف بی آر کے ساتھ رجسٹرڈ ہیں اوران 21 ہزار رجسٹرڈ جیولرز میں سے بھی صرف 10 ہزار 524 نے ٹیکس ریٹرن جمع کرائیں جب کہ بیشتر جیولرز اپنی آمدنی کم ظاہر کرکے ٹیکس چھپا رہے ہیں، ٹیکس چھپانے والے جیولرز کے خلاف کارروائی کا فیصلہ کیا گیا ہے۔