Live Updates

کپتان کا فائنل میں ناقص کارکردگی کے باوجود حارث رؤف کا بھرپور دفاع

منگل 30 ستمبر 2025 12:37

دبئی (اُردو پوائنٹ اخبارتازہ ترین - این این آئی۔ 30 ستمبر2025ء)قومی ٹی ٹوئنٹی کرکٹ ٹیم کے کپتان سلمان علی آغا ایشیا کپ فائنل میں ناقص کارکردگی کے باوجود حارث رؤف کے دفاع میں سامنے آگئے۔سلمان علی آغا کے مطابق یہ درست نہیں کہ صرف ایک کھلاڑی کی وجہ سے پاکستان میچ ہارا، ہم بطور ٹیم ہارتے اور جیتتے ہیں۔

(جاری ہے)

انہوں نے کہا کہ حارث ہمارے بہترین بولرز میں سے ایک ہیں، فائنل میں ان کا دن اچھا نہیں تھا لیکن یہ کھیل کا حصہ ہے۔

کپتان نے مزید کہا کہ جب بھارت کو چھ اوورز میں 63 رنز چاہیے تھے تو سب سے بہتر آپشن حارث ہی لگے، اگر انہیں نہ آزماتے تو کہا جاتا کہ بہترین بولر کو کیوں نہیں موقع دیا۔سلمان علی آغا نے اس بات پر زور دیا کہ یہ کہنا درست نہیں کہ حارث کے اوور کی وجہ سے میچ ہمارے ہاتھ سے نکلا۔واضح رہے کہ حارث رؤف نے بھارت کے خلاف ایشیا کپ کے فائنل میں 3.4 اوورز میں 50 رنز دیے تھے اور کوئی وکٹ حاصل نہ کرسکے۔