دو روز میں سونا مزید 9 ہزار78 روپے مہنگا، نئی قیمت 4 لاکھ 6 ہزار روپے سے تجاوز کرگئی

ملک میں آج سونے کی قیمت میں 3 ہزار178 روپے کا اضافہ ہوا، پچھلے ایک ماہ میں سونے کے نرخوں میں 45 ہزار روپے سے زائد اضافہ ریکارڈ کیا گیا

ثنااللہ ناگرہ منگل 30 ستمبر 2025 19:13

دو روز میں سونا مزید 9 ہزار78 روپے مہنگا، نئی قیمت 4 لاکھ 6 ہزار روپے سے ..

کراچی ( اردوپوائنٹ اخبار تازہ ترین۔ آئی پی اے۔ 30 ستمبر 2025ء ) عالمی مارکیٹ میں سونے کی قیمتوں میں اتار چڑھاؤ کا سلسلہ جاری ہے، عالمی منڈی میں سونے کے نرخ بڑھنے پر پاکستان میں بھی قیمتوں میں نمایاں اضافہ ہوگیا ہے۔ میڈیا رپورٹ کے مطابق عالمی مارکیٹ میں سونے کی قیمتوں میں اضافہ ہونے کے باعث پاکستان میں بھی سونے کی قیمت بڑھ گئی ہے۔ دوروزمیں سونے کے نرخوں میں 9 ہزار 78 روپے کا اضافہ ریکارڈ کیا گیا۔

بڑے اضافے کے بعد فی تولہ سونے کی نئی قیمت بلند ترین سطح پر پہنچ گئی ہے۔ آج ملک کی صرافہ مارکیٹوں میں فی تولہ سونا 3 ہزار 178 روپے مہنگا ہوا ہے، جس کے باعث فی تولہ سونے کی نئی قیمت بڑھ کر 4 لاکھ 6 ہزار 778 روپے کی بلند ترین سطح پر پہنچ گئی ہے۔ اسی طرح دس گرام سونے کی قیمت بھی بڑھ گئی ہے۔

(جاری ہے)

10 گرام سونے کی قیمت میں دو ہزار 725 روپے کا اضافہ ہوا ہے۔

نئی قیمت 3 لاکھ 48 ہزار 746 روپے کی سطح پر پہنچ گئی ہے۔ یاد رہے ایک ماہ قبل 24 قیراط سونے کی قیمت تقریباً 3 لاکھ 59 ہزار روپے کی سطح پر ریکارڈ کی گئی تھی۔ لیکن پچھلے ایک ماہ میں سونے کے نرخوں میں 45 ہزار روپے سے زائد بڑھ گئے ہیں۔ اسی طرح عالمی مارکیٹ میں فی اونس سونے کی قیمت 37 ڈالر کے اضافے کے ساتھ نئی قیمت 3 ہزار 855 ڈالر کی سطح پر پہنچ گئی ہے۔

دوسری جانب نئی سرمایہ کاری حکمت عملی جیسے عوامل کے باعث انٹربینک مارکیٹ میں پیر کو بھی ڈالر تنزلی سے دوچار رہا جبکہ اوپن مارکیٹ میں ڈالر مستحکم رہا۔ریکوڈک کے منصوبوں میں غیرملکی سرمایہ کاری کے نئے معاہدوں کی ذمہ داری اقتصادی رابطہ کمیٹی کے سپرد کیے جانے سے ریکوڈک میں سالانہ 2 سے 3ارب ڈالر کی متوقع سرمایہ کاری کی آمد، سعودی عرب کی ایس آئی ایف سی کی معاونت سے پاکستان کے توانائی معدنیات کے شعبوں میں نئی سرمایہ کاری کی حکمت عملی جیسے عوامل کے باعث انٹربینک مارکیٹ میں پیر کو بھی ڈالر تنزلی سے دوچار رہا جبکہ اوپن مارکیٹ میں ڈالر مستحکم رہا۔