پاکستان کا تجارتی حجم بڑھانے کیلئے نیو سلک وے فورم کے تحت علاقائی کانفرنس کا اعلان

رکن ممالک کو باہمی رابطوں اور تجارت کے فروغ کے لیے ٹریڈ کوریڈورز کے قیام پر توجہ دینا ہوگی، وفاقی وزیر مواصلات

جمعرات 2 اکتوبر 2025 01:40

اسلام آباد (اُردو پوائنٹ اخبارتازہ ترین - این این آئی۔ 02 اکتوبر2025ء)پاکستان نے علاقائی تجارتی حجم بڑھانے کے لیے سلک وے فورم کے تحت بڑی علاقائی کانفرنس منعقد کرنے کا اعلان کردیا۔قازقستان میں نیو سلک وے فورم کے تحت ذرائع آمدورفت پر 12 ممالک کے وزرا کی رانڈ ٹیبل کانفرنس منعقد ہوئی جس میں وفاقی وزیر مواصلات عبدالعلیم خان نے پاکستان کی نمائندگی کی۔

کانفرنس سے خطاب کرتے ہوئے عبدالعلیم خان نے کہا کہ رکن ممالک کو باہمی رابطوں اور تجارت کے فروغ کے لیے ٹریڈ کوریڈورز کے قیام پر توجہ دینا ہوگی کیوں کہ تجارتی حجم بڑھانے کیلئے زمینی رابطوں میں اضافہ وقت کی ضرورت بن چکا ہے۔وفاقی وزیر مواصلات نے کہا کہ سلک وے کے مقاصد کے حصول کیلئے فضائی پروازوں کی تعداد بڑھانا بھی ناگزیر ہے تاکہ ان ممالک کی بزنس کمیونٹی اور شہری زیادہ سے زیادہ سفر کر سکیں۔

(جاری ہے)

انہوں نے اعلان کیا کہ 23 اور 24 اکتوبر کو اسلام آباد میں ریجنل ٹرانسپورٹ منسٹرز کانفرنس منعقد ہوگی اور تمام رکن ممالک کو شرکت کی دعوت دی گئی ہے۔عبدالعلیم خان نے کہا کہ وسط ایشیائی ریاستیں پاکستان کے لیے گیٹ وے کی حیثیت رکھتی ہیں اور علاقائی تعاون سے معیشت اور ذرائع مواصلات میں بہتری لائی جا سکتی ہے۔ انہوں نے کہا کہ قازقستان کے نائب صدر اور وزرا کا حالیہ دورہ پاکستان کے لیے انتہائی سود مند ثابت ہوا، جب کہ اس فورم سے ایک دوسرے کے تجربات سے سیکھنے کا موقع مل رہا ہے۔کانفرنس کے میزبان وزیر ٹرانسپورٹ نورلان سوران بائیف نے اپنے خطاب میں پاکستان کے لیے خیرسگالی کے جذبات کا اظہار کیا اور فورم کے مثبت نتائج کی امید ظاہر کی۔