موجودہ حالات میں پاکستان کو سب سے زیادہ معاشی استحکام کی ضرورت ہے، گورنر سندھ

جمعہ 3 اکتوبر 2025 18:55

کراچی (اُردو پوائنٹ اخبارتازہ ترین - این این آئی۔ 03 اکتوبر2025ء) گورنر سندھ کامران خان ٹیسوری نے کہا ہے کہ موجودہ حالات میں پاکستان کو سب سے زیادہ معاشی استحکام کی ضرورت ہے، اور اس کے لیے ٹیکس کلیکشن اور ریونیو کے نظام کو عوامی اعتماد کے قابل بنانا ناگزیر ہے۔ انہوں نے افسران کو مخاطب کرتے ہوئے کہا کہ ملک کو سنوارنے کا وقت آپ کو ملا ہے، لہٰذا اپنی بہترین صلاحیتوں کو بروئے کار لائیں۔

ان خیالات کا اظہار گورنر سندھ نے نیشنل انسٹیٹیوٹ آف پبلک ایڈمنسٹریشن (نیپا) میں 44ویں مڈ کیرئر مینجمنٹ کورس (MCMC) کی تقسیمِ اسناد کی تقریب میں بطورِ مہمانِ خصوصی خطاب کرتے ہوئے کیا۔ تقریب میں ایڈمنسٹریٹر کراچی ڈاکٹر سید سیف الرحمٰن سمیت اعلیٰ سرکاری افسران اور کورس کے شرکاء نے شرکت کی۔

(جاری ہے)

تقریب سے خطاب کرتے ہوئے گورنر سندھ نے کہا کہ کامیابی وہی ہے جس کا ضمیر مطمئن ہو۔

پاکستان بے شمار قربانیوں کے بعد حاصل کیا گیا، اس کی قدر ہم سب پر لازم ہے۔ انہوں نے پاکستانیوں کی عالمی سطح پر کامیابیوں کا ذکر کرتے ہوئے کہا کہ ورلڈ بینک، سعودی اسٹیٹ بینک اور ایمریٹس ائرلائن میں پاکستانیوں کی خدمات باعثِ فخر ہیں، جو اس بات کا ثبوت ہیں کہ ہمارے ملک میں ٹیلنٹ کی کوئی کمی نہیں۔ انہوں نے کہا کہ یہی ٹیلنٹ ملک کو ترقی کی راہوں پر گامزن کر سکتا ہے، بشرطیکہ ہم اس کی قدر کریں۔

تعلیم کے شعبے پر بات کرتے ہوئے گورنر سندھ نے کہا کہ دو کروڑ بچے اسکول نہیں جاتے جبکہ تین کروڑ بچے بغیر ناشتے اسکول جاتے ہیں۔ اس ضمن میں "گورنر انیشیٹیوز" کے تحت ہزاروں بچوں کو ناشتہ فراہم کیا جا رہا ہے۔گورنر سندھ نے افسران کو یاد دلایا کہ ان کے ہاتھ میں اختیار ہے اور اللہ تعالیٰ ان سے اس کا حساب لے گا۔ انہوں نے کہا کہ آپ زندگی کے نشیب و فراز دیکھ چکے ہیں، اب عوامی خدمت میں اپنا کردار ادا کریں۔ آخر میں انہوں نے کہا کہ اللہ نے آپ کو موقع دیا ہے، ملک کی ترقی میں اپنا حصہ ڈالیں۔تقریب کے اختتام پر گورنر سندھ نے ایڈمنسٹریٹر کراچی ڈاکٹر سیف الرحمٰن کے ہمراہ کورس مکمل کرنے والے افسران میں اسناد تقسیم کیں اور ان کی کامیابی کے لیے نیک تمناؤںنکاناظہارنکیا۔