پروٹیز کیخلاف پہلے ٹیسٹ کیلئے پاکستان کی پلیئنگ الیون فائنل، 38 سالہ آصف آفریدی ڈیبیو کرینگے

اتوار سے شروع ہونیوالے پہلے ٹیسٹ میں پاکستان ٹیم 7 بیٹسمینوں، 2 فاسٹ بولرز اور 2 سپنر کے ساتھ اترنے کی حکمت عملی اپنائے گی

ذیشان مہتاب ہفتہ 11 اکتوبر 2025 11:39

پروٹیز کیخلاف پہلے ٹیسٹ کیلئے پاکستان کی پلیئنگ الیون فائنل، 38 سالہ ..

لاہور (اردو پوائنٹ تازہ ترین اخبار ۔ 11 اکتوبر 2025ء ) آئی سی سی ٹیسٹ چیمپئن شپ کے چوتھے سائیکل 27-2025ء میں پاکستان کرکٹ ٹیم شان مسعود کی قیادت میں 2 ٹیسٹ میچز پر مشتمل سیریز دفاعی چیمپئن جنوبی افریقا کے خلاف کھیلنے میدان میں اتر رہی ہے۔

قذافی اسٹیڈیم، لاہور میں اتوار سے شروع ہونے والے پہلے ٹیسٹ میں پاکستان ٹیم 7 بیٹرز، 2 فاسٹ بولرز اور 2 اسپنرز کے ساتھ اترنے کی حکمت عملی اپنائے گی۔

وائرل فیور کے سبب دائیں ہاتھ کے اسپنر ساجد خان کی جگہ آصف آفریدی 11 رکنی ٹیم کا حصہ بنیں گے، 38 سال کے بائیں ہاتھ کے سپنر آصف آفریدی نے 57 فرسٹ کلاس میچوں میں 25.49 کی اوسط سے 198 وکٹیں حاصل کی ہیں، ان کے ساتھ تجربے کار اسپنر نعمان علی ہوں گے۔

39 سال کے نعمان علی نے 19 ٹیسٹ میں 24.75 کی اوسط سے 83 وکٹیں حاصل کی ہیں۔

(جاری ہے)

فاسٹ بولنگ میں شاہین شاہ آفریدی ایک سال بعد ٹیسٹ ٹیم میں واپسی کر رہے ہیں۔

31 ٹیسٹ میں 116 وکٹیں لینے والے بائیں ہاتھ کے تیز بولر کے نئی گیند پارٹنر حسن علی ہوں گے، 24 ٹیسٹ میں 80 وکٹیں لینے والے دائیں ہاتھ کے تیز بولر حسن علی نے اپنا آخری ٹیسٹ جنوری 2024ء میں آسٹریلیا کے خلاف سڈنی میں کھیلا تھا۔

پاکستان ٹیم کی اننگز کا آغاز امام الحق اور عبداللہ شفیق کریں گے۔ جنوبی افریقا کے خلاف لاہور میں کھیلے جانے والے پہلے ٹیسٹ میں پاکستان کے 11 کھلاڑیوں میں ، امام الحق، عبداللہ شفیق، شان مسعود ( کپتان)، بابر اعظم، سعود شکیل، محمد رضوان ( وکٹ کیپر)، سلمان علی آغا، شاہین شاہ آفریدی، حسن علی، نعمان علی اور آصف آفریدی شامل ہوں گے۔