خیبرپختونخوا میں اپوزیشن کی حکومت بننے کے امکانات روشن ہیں، رانا ثنااللہ

ہفتہ 11 اکتوبر 2025 22:06

اسلام آباد (اُردو پوائنٹ اخبارتازہ ترین - این این آئی۔ 11 اکتوبر2025ء) وزیراعظم کے مشیر رانا ثنااللہ نے کہاہے کہ وزیراعلیٰ کے انتخاب سے متعلق پی ٹی آئی کیلئے کافی مشکلات نظرآرہی ہیں، اپوزیشن کی حکومت بننے کے امکانات روشن ہیں۔ایک انٹرویومیں انہوںنے کہاکہ خیبرپختونخوا میں کسی کی بھی حکومت ہوکارروائیوں میں رکاوٹ نہیں ڈال سکتے، بانی پی ٹی آئی دہشت گردوں کیخلاف آپریشن کی مخالفت کررہے ہیں۔

مشیرِ وزیرِ اعظم نے کہا کہ سلمان اکرم نے کہا علی امین بانی کے حکم کی تعمیل نہیں کررہے اس لیے ہٹایا۔

(جاری ہے)

انہوںنے کہاکہ پی ٹی آئی کی صوبائی پارلیمانی پارٹی میں بہت زیادہ گروپنگ ہے، مختلف گروپوں نیایک دوسرے کولتاڑا ہے اوراختلافات ہیں،انھوں نے بتایا کہ خیبرپختونخوا میں بہت زیادہ بیڈ گورننس اور کرپشن ہوئی ہے، ہوسکتاہے پی ٹی آئی کی صوبائی پارلیمانی پارٹی کاایک گروپ الگ ہوجائے، کے پی میں پی ٹی آئی کے 20،30 افراد الگ ہوکر گروپ بنالیں تو انھیں مشکلات ہوسکتی ہیں۔سیاسی مشیر نے کہا کہ پی ٹی آئی کی بیڈ گورننس ہے، اپوزیشن کی حکومت بننے کے امکانات روشن ہیں، وزیراعلیٰ کے انتخاب سے متعلق پی ٹی آئی کیلئے کافی مشکلات نظرآرہی ہیں