سپیکر پنجاب اسمبلی کو کامن ویلتھ پارلیمنٹیرین آف دی ایئر ایوارڈ سے نوازا گیا

اتوار 12 اکتوبر 2025 16:20

لاہور (اُردو پوائنٹ اخبارتازہ ترین - اے پی پی۔ 12 اکتوبر2025ء) کامن ویلتھ پارلیمنٹری ایسوسی ایشن کی جانب سے سپیکر پنجاب اسمبلی ملک محمد احمد خاں کو کامن ویلتھ پارلیمنٹیرین آف دی ایئر ایوارڈ سے نوازا گیا،یہ ایوارڈ ان پارلیمنٹرینز کو دیا جاتا ہے جو پارلیمانی جمہوریت کے فروغ، بہترین حکمرانی وعوامی نمائندگی میں غیر معمولی قیادت، محنت اور لگن کا مظاہرہ کریں۔

ترجمان پنجاب اسمبلی کے مطابق بارباڈوس میں68ویں کامن ویلتھ پارلیمنٹری کانفرنس کا انعقاد جاری ہے، اس دوران سپیکر پنجاب اسمبلی ملک محمد احمد خاں کو جمہوری روایات کے فروغ میں موثر کردار ادا کرنے پر ایوارڈ دیا گیا ، وہ پہلے پاکستانی اور ایشیائی اسپیکر ہیں جنہیں یہ عالمی اعزاز دیا گیا،ایوارڈ کی تقریب وزیراعظم بارباڈوس کی سرکاری رہائش گاہ پر منعقد ہوئی جہاں اسپیکر پنجاب اسمبلی ملک محمد احمد خاں کو کامن ویلتھ پارلیمنٹیرین آف دی ایئر ایوارڈ دیا گیا۔

(جاری ہے)

کامن ویلتھ پارلیمنٹری ایسوسی ایشن میں 50 سے زائد ممالک کی 180 پارلیمنٹس شامل ہیں، ان میں سے اسپیکر ملک محمد احمد خاں کا منتخب ہونا پاکستان وصوبہ پنجاب کے لیے ایک بڑا اعزاز اور باعثِ فخر ہے۔یہ ایوارڈ نہ صرف اسپیکر پنجاب اسمبلی ملک محمد احمد خاں کی انفرادی خدمات کا اعتراف ہے بلکہ یہ پنجاب اسمبلی کے عالمی پارلیمانی فورمز میں بڑھتے ہوئے کردار اور جمہوری اقدار کے فروغ کا مظہر بھی ہے۔