Live Updates

دہشتگرد تنظیموں کو افغانستان میں موجود عناصر کی حمایت حاصل ہے ‘ شہباز شریف

پاکستان کے دفاع پر کوئی سمجھوتا نہیں ہو گا ،ہر اشتعال انگیزی کا بھرپور اور موثر جواب دیا جائے گا وزیر اعظم کاافغانستان میں موجود دہشتگردوں کے ٹھکانوں کو کامیابی سے نشانہ بنانے پر پاک افواج کو خراج تحسین جام شہادت نوش کرنے والے سکیورٹی فورسز کے 23 جوانوں کو خراج عقیدت ،اہل خانہ سے اظہار تعزیت

اتوار 12 اکتوبر 2025 18:00

لاہور(اُردو پوائنٹ اخبارتازہ ترین - این این آئی۔ 12 اکتوبر2025ء) وزیراعظم شہباز شریف نے افغانستان کی اشتعال انگیزی کے جواب میں پاکستان کی جانب سے بھرپور اور موثر کاروائی اور پاکستان پر حملوں میں ملوث افغانستان میں موجود دہشتگردوں کے ٹھکانوں کو کامیابی سے نشانہ بنانے پر پاک افواج کو خراج تحسین پیش کیا ہے ۔وزیر اعظم شہباز شریف نے کامیاب کارروائیوں کے دوران جام شہادت نوش کرنے والے سکیورٹی فورسز کے 23 جوانوں کو خراج عقیدت پیش کرتے ہوئے شہدا ء کے درجات کی بلندی کیلئے دعا اور اہل خانہ سے اظہار تعزیت کیا ۔

وزیراعظم شہباز شریف نے دہشتگردوں کے خلاف کاروائیوں میں زخمی ہونے والے سکیورٹی فورسز کے جوانوں کی جلد صحت یابی کیلئے بھی دعا کی ۔ انہوں نے کہا کہ پاک افواج کی پیشہ ورانہ مہارت پر فخر ہے ،پاکستان کے دفاع پر کوئی سمجھوتا نہیں ہو گا اور ہر اشتعال انگیزی کا بھرپور اور موثر جواب دیا جائے گا۔

(جاری ہے)

پاک فوج نے ہمیشہ ہر قسم کی بیرونی جارحیت کا منہ توڑ جواب دیا ہے ،پوری قوم پاکستان کی سکیورٹی فورسز کے ساتھ کھڑی ہے ۔

پاکستان نے کئی دفعہ افغانستان کو وہاں موجود فتن الخوارج اور فتن الہندوستان جیسے دہشت گرد عناصر کے بارے میں معلومات دی ہیں، جو افغانستان کی سرزمین سے پاکستان کے خلاف کارروائیاں کر رہے ہیں ،دہشت گرد تنظیموں کو افغانستان میں موجود عناصر کی حمایت حاصل ہے ۔پاکستان توقع رکھتا ہے کہ افغان نگران حکومت اس امر کو یقینی بنائے گی کہ اس کی سرزمین پاکستان کے خلاف دہشت گرد عناصر کے استعمال میں نہ آئے ۔