Live Updates

پاک فوج نے ایک بار پھر یہ ثابت کر دیا ہے کہ پاک سرزمین کا تحفظ ناقابلِ تسخیر ہے،حاجی علی مدد جتک

اتوار 12 اکتوبر 2025 19:55

کوئٹہ(اُردو پوائنٹ اخبارتازہ ترین - این این آئی۔ 12 اکتوبر2025ء) پاکستان پیپلز پارٹی کے مرکزی رہنما و رکن صوبائی اسمبلی حاجی علی مدد جتک نے پاک فوج کی ملکی سالمیت اور دفاع کے لیے کی گئی مؤثر کارروائی پر اظہارِ مسرت کرتے ہوئے کہا ہے کہ پاک فوج نے ایک بار پھر یہ ثابت کر دیا ہے کہ پاک سرزمین کا تحفظ ناقابلِ تسخیر ہے۔انہوں نے کہا کہ کسی بھی ملک کو یہ اجازت نہیں دی جا سکتی کہ وہ اپنی سرزمین کو پاکستان کے خلاف استعمال ہونے دے۔

پاکستان کی بہادر افواج اور عوام ہر محاذ پر ملکی دفاع کے لیے سینہ سپر ہیں اور کسی بھی خطرے کا مقابلہ کرنے کی بھرپور صلاحیت رکھتی ہیں۔رکن اسمبلی حاجی علی مدد جتک نے کہا کہ افغانستان کو اب فیصلہ کرنا ہوگا کہ وہ ایک اچھے ہمسائے کا کردار ادا کرے یا دوسروں کا آلہ کار بننے کا راستہ اختیار کرے۔

(جاری ہے)

پاکستان ہمیشہ خطے میں دیرپا امن کا خواہاں رہا ہے اور ہم نہیں چاہتے کہ کسی بھی ہمسایہ ملک کے ساتھ تعلقات کو نقصان پہنچے۔

انہوں نے مزید کہا کہ خطے کے امن و استحکام کے لیے تمام ہمسایہ ممالک کو اپنی ذمہ داریوں کا تعین کرنا ہوگا تاکہ امن و ترقی کا سفر آگے بڑھ سکے۔آخر میں حاجی علی مدد جتک نے واضح کیا کہ پاکستان کی سالمیت اور خودمختاری ہماری ریڈ لائن ہے، اور کسی کو بھی یہ اجازت نہیں دی جائے گی کہ وہ پاک سرزمین کی حرمت کو پامال کرے۔