Live Updates

سہیل آفریدی خیبرپختونخوا کے نئے وزیر اعلیٰ منتخب ، اپوزیشن ارکان نے ایوان سے احتجاجاً واک آئوٹ کیا

پیر 13 اکتوبر 2025 15:05

پشاور (اُردو پوائنٹ اخبارتازہ ترین - اے پی پی۔ 13 اکتوبر2025ء) سہیل آفریدی خیبرپختونخوا کے نئے وزیر اعلیٰ منتخب ہو گئے ۔خیبرپختونخوا اسمبلی میں نئے وزیراعلیٰ کے انتخاب کے لیے اجلاس سپیکر بابر سلیم سواتی کی صدارت میں ہوا ۔اپوزیشن نےانتخابی عمل پر تحفظات کا اظہار کرتے ہوئے ایوان سے واک آؤٹ کیا۔ نئے وزیراعلیٰ کے انتخاب کے لیے چار امیدوار وں نے کاغذات جمع کرائے تھے جن میں پاکستان تحریک انصاف کے امیدوار سہیل آفریدی ، جمعیت علمائے اسلام ف کے امیدوار مولانا لطف الرحمان ، مسلم لیگ ن کے امیدوار سردار شاہ جہان یوسف اور پاکستان پیپلز پارٹی کے امیدوار ارباب زرک خان شامل تھے ۔

سپیکر نے نتیجہ سنایا کہ پی ٹی آئی کے امیدوارسہیل آفریدی 90 ووٹ لیکر وزیر اعلیٰ منتخب ہو گئے ہیں۔

(جاری ہے)

اس موقع پر سہیل خان آفریدی نے صوبائی اسمبلی سے خطاب میں کہا کہ میں سب سے پہلے پاکستانی، پھر پختون اور قبائلی ہوں ۔انہوں نے کہا کہ میں نے محنت اور عوامی اعتماد کے نتیجہ میں یہ منصب حاصل کیا ہے اور میرا پیغام ترقی، مساوات اور قبائلی اضلاع کی فکری بہتری ہے۔

سہیل آفریدی نے کہا کہ میرا تعلق قبائلی اضلاع سے ہے، قبائلی اضلاع ترقی میں پیچھے رہ گئے ہیں اور میری حکومت کا اولین ہدف انہی علاقوں کی تیز رفتار ترقی ہوگا۔ انہوں نے کہا کہ وہ اقتدار کو نہیں، بلکہ خدمت کو اپنا مقصد سمجھتے ہیں، اور وہ اپنی ذات یا مفاد کے لیے نہیں بلکہ عوامی نمائندے کے طور پر فرض نبھانے آئے ہیں۔ انہوں نے کہا کہ دہشت گردی کی جنگ میں ہم سب سے زیادہ متاثر ہوئے ہیں، اور آج بھی ہمارے لوگ قربانیاں دے رہے ہیں۔ان کا کہنا تھا کہ دہشت گردی کے نتیجہ میں آج بھی ہمارے لوگ شہید ہورہے ہیں ۔انہوں نے کہا کہ ان کی حکومت عوام کے اعتماد پر پورا اترنے کی پوری کوشش کرے گی اور صوبے کے امن و استحکام کے لیے ہر ممکن قدم اٹھائے گی۔