Live Updates

وزیرخزانہ محمداورنگزیب کی آئی ایف سی کے علاقائی نائب صدر سے ملاقات، ریکو ڈک منصوبے کی جلد مالی تکمیل کیلئے اقدامات پر اتفاق

پیر 13 اکتوبر 2025 21:40

واشنگٹن (اُردو پوائنٹ اخبارتازہ ترین - اے پی پی۔ 13 اکتوبر2025ء) پاکستان اوربین الاقوامی مالیاتی کارپویشن(آئی ایف سی) نے ریکو ڈک منصوبے کی جلد مالی تکمیل کے لیے اقدامات پر اتفاق کیاہے۔یہ بات وفاقی وزیر خزانہ و محصولات سینیٹر محمد اورنگزیب اوربین الاقوامی مالیاتی کارپوریشن(آئی ایف سی) کے علاقائی نائب صدر برائے مشرق وسطیٰ، وسطی ایشیا، ترکیہ، افغانستان اور پاکستان ریکارڈو پُلِتی کے درمیان واشنگٹن میں ملاقات میں کہی گئی۔

وزارت خزانہ کی جانب سے جاری کردہ تفصیلات کے مطابق وفاقی وزیر خزانہ و محصولات سینیٹر محمد اورنگزیب عالمی بینک اوربین الاقوامی مالیاتی فنڈ کے سالانہ اجلاسوں میں شرکت کیلئے اپنی ٹیم کے ہمراہ واشنگٹن ڈی سی پہنچ گئے۔ وزیر خزانہ نے پیرکو اپنی سرکاری ملاقاتوں کا آغاز بین الاقوامی مالیاتی کارپوریشن(آئی ایف سی) کے علاقائی نائب صدر برائے مشرق وسطیٰ، وسطی ایشیا، ترکیہ، افغانستان اور پاکستان ریکارڈو پُلِتی سے ملاقات کے ساتھ کیا۔

(جاری ہے)

ملاقات کے دوران وزیر خزانہ نے پاکستان کے مضبوط معاشی اشاریوں کو اجاگر کیا۔وزیرخزانہ نے پاکستان کے ساتھ آئی ایف سی کے شراکتی کردار کو سراہا اور نجی شعبے میں سرمایہ کاری کے فروغ کے لیے آئی ایف سی کے اہم کردار پر اطمینان کا اظہار کیا جس میں 10 سالہ کنٹری پارٹنرشپ فریم ورک کے تحت کئی ارب ڈالر کی سرمایہ کاری شامل ہے۔ فریقین نے آئی ایف سی کے اہم ریکو ڈک منصوبے کی جلد مالی تکمیل کے لیے اقدامات پر اتفاق کیا۔

وزیر خزانہ نے اسلام آباد میں آئی ایف سی کے نئے علاقائی دفتر کے قیام کا خیرمقدم بھی کیا۔ وزیر خزانہ نے اسلامی ترقیاتی بینک کے صدر ڈاکٹر محمد سلیمان الجاسر سے بھی نتیجہ خیز ملاقات کی۔ وزیر خزانہ نے پاکستان کے لیے بینک کی طویل مدتی معاونت اور تعاون پر شکریہ ادا کیا۔ انہوں نے بینک کے جاری منصوبوں کا جائزہ لیا اور ان کی بروقت تکمیل کی اہمیت پر زور دیا۔ سینیٹر اورنگزیب نے ایم 6 موٹروے کے دو حصوں کی مالی معاونت کی منظوری پر اسلامی ترقیاتی بینک کے صدر کاشکریہ ادا کیا۔ انہوں نے پاکستان میں پولیو کے خاتمے کی کوششوں اور تیل کی فراہمی کے منصوبوں میں آئندہ تعاون کی امید ظاہر کی۔ فریقین نے پاکستان کے لیے نئے کنٹری انگیجمنٹ فریم ورک کی تیاری پر اتفاق کیا۔