Live Updates

پنجاب حکومت کا انتہا پسندی میں ملوث جماعت پر پابندی کیلئے وفاق سے سفارش کا فیصلہ

نفرت و اشتعال انگیزی اور قانون شکنی میں ملوث افراد کوفوری گرفتار کیا جائے گا، سوشل میڈیا اکاؤنٹس بند اور بینک اکاؤنٹس منجمد کیے جائیں گے، جماعت کی قیادت انسداد دہشتگردی ایکٹ کے فورتھ شیڈول میں شامل ہوگی

ساجد علی جمعرات 16 اکتوبر 2025 10:57

پنجاب حکومت کا انتہا پسندی میں ملوث جماعت پر پابندی کیلئے وفاق سے سفارش ..

لاہور (اُردو پوائنٹ اخبارتازہ ترین۔ 16 اکتوبر2025ء) پاکستان مسلم لیگ ن کی پنجاب حکومت نے انتہا پسندی میں ملوث جماعت پر پابندی کیلئے وفاق سے سفارش کا فیصلہ کرلیا۔ اطلاعات کے مطابق وزیراعلیٰ پنجاب مریم نواز کی زیر صدارت امن و امان سے متعلق اجلاس ہوا، جس میں یہ فیصلہ کیا گیا کہ پنجاب میں نفرت و اشتعال انگیزی اور قانون شکنی میں ملوث افراد کوفوری گرفتار کیا جائے گا، پنجاب حکومت وفاقی حکومت کو انتہا پسند جماعت پر پابندی عائد کرنے کی سفارش کرے گی، انتہا پسند جماعت کی قیادت کو انسداد دہشتگردی ایکٹ کے فورتھ شیڈول میں شامل کیا جائے گا۔

اجلاس کے اعلامیے میں کہا گیا ہے کہ پولیس افسران کی شہادت، سرکاری املاک کی تباہی میں ملوث رہنماؤں اور کارکنوں پر مقدمات چلیں گے، انتہا پسند جماعت کی تمام جائیدادیں اور اثاثے محکمہ اوقاف کی تحویل میں دی جائیں گی، انتہا پسند جماعت کے پوسٹرز، بینرز اور اشتہارات پر مکمل پابندی ہوگی، نفرت پھیلانے والی انتہا پسند جماعت کے سوشل میڈیا اکاؤنٹس بند کیے جائیں گے، انتہا پسند جماعت کے تمام بینک اکاؤنٹس منجمد کیے جائیں گے، لاؤڈ اسپیکر ایکٹ کی خلاف ورزی پر بھی سخت ترین کارروائی ہو گی۔

(جاری ہے)

اعلامیے سے معلوم ہوا ہے کہ محکمہ داخلہ پنجاب کی جانب سے ایک ماہ میں غیر قانونی اسلحہ جمع کروانے کا الٹی میٹم جاری کیا گیا ہے، ایک ماہ کے اندر شہری اپنے قانونی اسلحے کو خدمت مرکز سے رجسٹر کرائیں گے، اسلحہ فروشوں اور تمام ڈیلرز کے سٹاک کا معائنہ کرنے کا فیصلہ بھی کیا گیا ہے، پنجاب میں نئے اسلحہ لائسنس جاری کرنے پر مکمل پابندی کردی گئی ہے۔

اجلاس کے اعلامیے میں بتایا گیا ہے کہ پنجاب حکومت کی طرف سے وفاقی حکومت سےاسلحہ فیکٹریز اور مینوفیکچررز کو ریگولرائز کرنے کی سفارش کردی گئی ہے جب کہ صوبائی حکومت نے غیر قانونی اسلحہ رکھنے کی سزا میں اضافے کی منظوری بھی دے دی ہے، پنجاب میں غیر قانونی اسلحہ رکھنا ناقابل ضمانت جرم ہوگا، غیر قانونی اسلحہ رکھنے کی سزا 14 سال قید اور 20 لاکھ روپے تک جرمانہ ہوگا۔