ملک میں غیرملکی سرمایہ کاری کیلئے خصوصی ویزہ پروگرام شروع کرنے کا فیصلہ

پاکستان میں کاروبار کرنے والے افغان شہری بھی بزنس ویزہ حاصل کرکے یہاں کاروبار کرسکیں گے

ساجد علی جمعرات 16 اکتوبر 2025 15:05

اسلام آباد (اُردو پوائنٹ اخبارتازہ ترین۔ 16 اکتوبر2025ء) ملک میں غیرملکی سرمایہ کاری کیلئے خصوصی ویزہ پروگرام شروع کرنے کا فیصلہ کرلیا گیا۔ میڈیا رپورٹس کے مطابق ذرائع وزارت داخلہ کا کہنا ہے کہ وفاقی حکومت نے ملک میں غیرملکی سرمایہ کاری کو راغب کرنے کے لیے خصوصی ویزہ پروگرام شروع کرنے کا فیصلہ کیا ہے، جس کے تحت پاکستان میں کاروبار کرنے والوں کو بزنس ویزے دیئے جائیں گے۔

ذرائع کی جانب سے بتایا گیا ہے کہ نئی مجوزہ پالیسی کے تحت بزنس ویزے پر آنے والے کاروباری افراد کو ملٹی پل انٹری ویزہ جاری کیا جائے گا، حکومت کی اس نئی پالیسی کے تحت افغان شہری بھی فائدہ اٹھا سکیں گے اور پاکستان میں کاروبار کرنے والے افغان شہری بزنس ویزہ حاصل کرکے کاروبار کر سکیں گے۔

(جاری ہے)

ادھر وزیرخزانہ کی سعودی ہم منصب سے ملاقات ہوئی جس میں پاکستان میں سرمایہ کاری اور نجکاری کے امور پرگفتگو کی گئی، وفاقی وزیر خزانہ سینیٹر محمد اورنگزیب نے اپنے حالیہ دورہ امریکہ کے دوران سعودی عرب کے وزیر خزانہ محمد عبداللہ عبدالعزیز الجدعان سے اہم ملاقات کی جس میں پاکستان اور سعودی عرب کے مابین بڑھتے ہوئے تجارتی و اقتصادی تعلقات، سرمایہ کاری اور نجکاری کے امور پر تفصیلی بات چیت ہوئی۔

معلوم ہوا ہے کہ ملاقات کے دوران وزیر خزانہ نے سعودی ہم منصب کو پاکستان میں جاری نجکاری پروگرام، خاص طور پر قومی ایئر لائن (پی آئی ای) اور ہوائی اڈوں کی نجکاری پر ہونے والی پیش رفت سے آگاہ کیا، محمد اورنگزیب نے پاکستان میں نجی شعبے کی سرمایہ کاری کے فروغ پر زور دیا اور اس سلسلے میں انٹرنیشنل فنانس کارپوریشن (آئی ایف سی) اور ملٹی لیٹرل انویسٹمنٹ گارنٹی ایجنسی (میگا) کے اہم کردار پر بھی تبادلہ خیال کیا، وزیر خزانہ نے پاکستان میں انفراسٹرکچر منصوبوں کے لیے سعودی مالی معاونت اور تعاون کی خواہش کا اظہار کیا، جس پر سعودی وزیر خزانہ نے مثبت ردعمل دیا۔

محمد اورنگزیب نے اس موقع پر یہ بھی یقین دہانی کرائی کہ پاکستان آئی ایم ایف پروگرام کے تحت جاری اصلاحاتی ایجنڈے پر ثابت قدمی سے عمل پیرا ہے اور معیشت کو پائیدار بنیادوں پر مستحکم کرنے کے لیے حکومت سنجیدہ اقدامات کر رہی ہے، ملاقات میں دونوں وزرائے خزانہ نے اس بات پر اتفاق کیا کہ پاکستان اور سعودی عرب کے تعلقات صرف روایتی دوستی تک محدود نہیں بلکہ دونوں ممالک کے درمیان سٹریٹیجک اقتصادی شراکت داری کے وسیع امکانات موجود ہیں جنہیں مزید وسعت دی جائے گی۔