وزیراعظم نے جیولوجیکل سروے آف پاکستان کی اپ گریڈ شدہ جیو سائنس ایڈوانسڈ ریسرچ لیبارٹریز کا افتتاح کر دیا

جمعہ 17 اکتوبر 2025 20:11

اسلام آباد (اُردو پوائنٹ اخبارتازہ ترین - این این آئی۔ 17 اکتوبر2025ء) وزیراعظم محمد شہباز شریف نے جیولوجیکل سروے آف پاکستان کی اپ گریڈ شدہ جیو سائنس ایڈوانسڈ ریسرچ لیبارٹریز (جی اے آر ایل) کا افتتاح کیا،چیف آف آرمی سٹاف فیلڈ مارشل سید عاصم منیر، وفاقی وزراء اور غیر ملکی شخصیات نے بھی افتتاحی تقریب میں شرکت کی۔جمعہ کو وزیراعظم آفس کے میڈیا ونگ سے جاری بیان کے مطابق اس منصوبے کا مقصد ملک کی معدنی تحقیق کی صلاحیتوں میں نمایاں اضافے اور پاکستان کے معدنی شعبے کی ترقی کی جانب اعلیٰ سطح کی توجہ مبذول کرانا ہے۔

اس لیبارٹری کا قیام ابتدائی طور پر 1991ء میں عمل میں لایا گیا تھا، اب اسے مکمل طور پر جدید خطوط پر استوار کیا گیا ہے تاکہ اسے بین الاقوامی معیار کے مطابق بنایا جا سکے۔

(جاری ہے)

چک شہزاد میں واقع اس جدید ترین لیبارٹری کمپلیکس کو ISO/IEC 17025 کی منظوری حاصل ہو گئی ہے جو اس کی جانچ اور کیلیبریشن کی تکنیکی مہارت کو عالمی معیار کے مطابق تسلیم کرتی ہے۔

اس پیش رفت کے نتیجے میں لیبارٹری اب کان کنی کی کمپنیوں کو JORC اور NI 43-101 رپورٹنگ معیارات کے تحت ذخائر کے تخمینے کے لیے درکار بین الاقوامی سطح پر تسلیم شدہ تجزیاتی اعداد و شمار فراہم کر سکے گی۔جیولوجیکل سروے آف پاکستان کے حکام کے مطابق اس اپ گریڈیشن اور سرٹیفیکیشن سے معدنی شعبے میں سرمایہ کاری کو فروغ ملے گا کیونکہ یہ لیبارٹری ان معتبر ڈیٹا کی فراہمی کو یقینی بنائے گی جس پر بین الاقوامی کان کنی کمپنیاں اور مالیاتی ادارے بڑے منصوبوں کے لیے انحصار کرتے ہیں۔تین دہائیوں پر محیط اپنے شاندار ماضی کی بنیاد پر یہ سہولت معدنی شعبے کی ترقی کی بدلتی ہوئی ضروریات کو پورا کرنیکے لئے اب ایک جدید ترین تحقیقی لیبارٹری کے طور پر خدمات انجام دے گی۔