وفاقی وزیراقتصادی امور و اسٹیبلشمنٹ ڈویژن احد چیمہ کی زیر صدارت اہم اجلاس، علاقائی تجارت بڑھانے کیلئے رابطہ جات اور علاقائی رابطہ کانفرنس پر تبادلہ خیال

پیر 20 اکتوبر 2025 19:01

اسلام آباد (اُردو پوائنٹ اخبارتازہ ترین - اے پی پی۔ 20 اکتوبر2025ء) وفاقی وزیر برائے اقتصادی امور و اسٹیبلشمنٹ ڈویژن احد چیمہ کی زیر صدارت پیر کو علاقائی تجارت کو بڑھانے کے لئے بہتر رابطوں کی حکمت عملیوں پر مرکوز اعلیٰ سطحی اجلاس منعقد ہوا جس میں علاقائی تجارتی راہداریوں کی صلاحیت بڑھانے پر خاص توجہ دی گئی۔ اجلاس میں رواں ہفتے اسلام آباد میں ہونے والی ریجنل کنکٹیویٹی کانفرنس (علاقائی رابطہ کانفرنس) کی تیاریوں کا بھی جائزہ لیا گیا۔

اجلاس میں وزیراعظم کے مشیر ڈاکٹر توقیر شاہ، وفاقی وزیر ریلوے حنیف عباسی، وفاقی وزیر مواصلات عبدالعلیم خان اور متعلقہ وزارتوں کے سینئر افسران نے شرکت کی۔متعلقہ وزارتوں کے حکام نے شرکاء کو علاقائی رابطہ کی شروعات پر تفصیلی بریفنگ دی جس میں تجارتی راہداریوں کو مضبوط بنانے اور علاقائی تجارت کے لئے انفراسٹرکچر بہتر بنانے کے اقدامات کا خاکہ پیش کیا گیا۔

(جاری ہے)

اس موقع پر گفتگو کرتے ہوئے وفاقی وزیر احد چیمہ نے زور دیا کہ پاکستان ریل اور سڑک دونوں نیٹ ورکس کے ذریعے علاقائی رابطہ کاری کو بڑھانے کے لئے پرعزم ہے۔ انہوں نے امید ظاہر کی کہ آنے والی علاقائی رابطہ کانفرنس میں اہم مفاہمتی یادداشتوں پر دستخط ہوں گے جو علاقائی رابطہ کاری اور معاشی انضمام کے لئے سنگ میل ثابت ہوں گے۔اس کے علاوہ متعلقہ وزارتوں کے افسران نے وفاقی وزراء کو رواں ہفتے اسلام آباد میں ہونے والی علاقائی رابطہ کانفرنس کی تیاریوں پر رپورٹ پیش کی۔

اس کانفرنس میں ترکیہ، سعودی عرب، ایران، مالدیپ، سری لنکا، بیلاروس سمیت تقریباً 10 ممالک کے نمائندے شرکت کریں گے۔ تیاریوں پر اعتماد کا اظہار کرتے ہوئے وفاقی وزیر احد چیمہ نے کہا کہ یہ پاکستان کے لئے فخر کی بات ہے کہ یہ کانفرنس پہلی بار اسلام آباد میں منعقد ہو رہی ہے اور اہم ممالک کے اعلیٰ حکام شرکت کریں گے۔