جمعیت علما اسلام سندھ کا8 فروری کو کراچی میں یومِ سیاہ منانے کا اعلان

احتجاجی مظاہرے سے جمعیت علما اسلام سندھ کے سیکریٹری جنرل علامہ راشد محمود سومرو خطاب کریں گے

منگل 3 فروری 2026 19:30

کراچی (اُردو پوائنٹ اخبارتازہ ترین - این این آئی۔ 03 فروری2026ء) جمعیت علما اسلام سندھ نے 8 فروری کو کراچی میں یومِ سیاہ منانے اور کراچی پریس کلب کے سامنے احتجاجی مظاہرہ کرنے کا اعلان کردیا ۔ احتجاجی مظاہرے سے جمعیت علما اسلام سندھ کے سیکریٹری جنرل علامہ راشد محمود سومرو خطاب کریں گے۔ احتجاج گل پلازہ آتشزدگی کے المناک سانحے میں حکومتی غفلت، 2024 کی انتخابی دھاندلی، سندھ حکومت کی نااہلی، بیڈ گورننس، بجلی و گیس کے مصنوعی بحران، بڑھتی ہوئی بدامنی کے خلاف کیا جائے گا۔

تفصیلات کے مطابق جمعیت علما اسلام سندھ کے نائب امیر قاری محمد عثمان کی صدارت میں جمعیت علما اسلام کی صوبائی مجلس عاملہ کے کراچی میں موجود اراکین، کراچی کے تمام اضلاع اور ٹاونز کے امرا و نظمائے عمومی، جیٹی آئی کے ذمہ داروں کا مشترکہ اجلاس منعقد ہوا۔

(جاری ہے)

اجلاس سے مولانا محمد غیاث، مولانا سمیع الحق سواتی، مولانا سید حماد اللہ شاہ، مولانا عمر صادق سمیت تمام اضلاع کے امرا و نظما نے بھی خطاب کیا۔

اجلاس میں کہا گیا کہ گل پلازہ سانحہ سندھ حکومت کی مجرمانہ غفلت کا نتیجہ ہے، جس میں سینکڑوں قیمتی انسانی جانوں کے ضیاع اور اربوں روپے کے نقصانات کے باوجود ذمہ داران کو بچانے کی کوشش کی جارہی ہے۔ جمعیت علمائے اسلام نے کمشنر کراچی کی رپورٹ کو حقائق کے منافی قرار دیتے ہوئے مسترد کردیا اور مطالبہ کیا کہ سانحے کے ذمہ دار عناصر کو فوری طور پر کٹہرے میں لایا جائے۔

اجلاس میں کہا گیا کہ بجلی و گیس کے مصنوعی بحران، بے قابو مہنگائی اور بدامنی نے عوام کی زندگی اجیرن بنا دی ہے، جبکہ 2024 کے انتخابات میں منظم دھاندلی کے ذریعے عوامی رائے کی بے توقیری کی گئی۔ انہوں نے اعلان کیا کہ 8 فروری کو ہونے والا احتجاج عوامی حقوق کے تحفظ، ووٹ کے حق کی بے توقیری اور حکومتی نااہلی کے خلاف بھرپور آواز ہوگی۔ اجلاس میں فیصلہ کیا گیا کہ جمعیت علما اسلام صوبہ سندھ کے زیرِ اہتمام 8 فروری کو سہ پہر 3 بجے پریس کلب پر احتجاجی مظاہرہ کیا جائے گا، جس میں شہریوں کی بڑی تعداد شرکت کرے گی اور عوامی مینڈیٹ پر ڈاکہ ڈالنے کے جرم سمیت سندھ حکومت کی عوام دشمن پالیسیوں کے خلاف سخت احتجاج کیا جائے گا۔