ْسینیٹ قائمہ کمیٹی اوورسیز پاکستانیز نے تارکین وطن کیلئے جاری منصوبوں پر بریفنگ طلب کرلی

اسلام آباد (اُردو پوائنٹ اخبارتازہ ترین - این این آئی۔ 09 فروری2026ء) سینیٹ کی قائمہ کمیٹی اوورسیز پاکستانیز نے تارکین وطن کیلئے جاری منصوبوں پر بریفنگ طلب کرلی جبکہ کمیٹی کو بتایا گیا ہے کہ بیرون ملک جانے کے خواہشمند افراد کو مفت سافٹ سکلز سرٹیفکیٹ دے رہے ہیں،اسلام آباد اور پنجاب میں اوورسیز پاکستانیز کے لئے عدالتوں کا قیام ہوچکا ہے،اوورسیز پاکستانیز کا پاکستان میں بیماری کی صورت میں مفت علاج ہوگا،ہر سال اوورسیز پاکستانیز کا کنونشن پاکستان میں ہوگا۔

اوورسیز پاکستانیز فائونڈیشن حکام نے بتایا ہے کہ یو اے ای، عمان اور ملائشیا کی جانب سے غیر اعلانیہ پابندیوں کے باعث پاکستانیوں کو ویزا ملنے میں مشکلات کا سامنا ہیں، یو اے ای نے پاکستانی افرادی قوت پر سوال اٹھایا تھا انہیں سوشل میڈیا کااستعمال نہیں آتا۔

(جاری ہے)

پیر کو ضمیر حسین گھمرو کی زیر صدارت سینیٹ کی قائمہ کمیٹی اوورسیز پاکستانیز کا اجلاس ہوا جس میں بریفنگ کے دوران اراکین نے پوچھا کہ بیرون ملک جانے والے پاکستانیوں کو سافٹ اسکلز دینے کا مقصد اور فائدہ کیا ہی جس پر اوورسیز پاکستانیز فانڈیشن کے حکام نے بتایا یورپی یونین کے تمام ممالک میں سافٹ سکلز کا سرٹیفکیٹ تسلیم کیا جاتا ہے، سافٹ سکلز سرٹیفکیٹ پانچ روز کی فزیکل اور آن لائن ٹریننگ سے حاصل کیا جاسکتا ہے۔

حکام نے بتایا کہ ہم مفت سافٹ سکلز سرٹیفکیٹ دے رہے ہیں، 4لاکھ 8ہزار افراد زیر تعلیم ہیں، اس پروگرام پر 30 لاکھ روپے خرچ ہوئے،او پی ایف حکام نے بتایا سالانہ ساڑھے 7لاکھ افراد بیرون ملک ملازمت کے لئے جاتے ہیں، 1971سے اب تک ایک کروڑ 20 لاکھ افراد بیرون ملک گئے ،اگر ایک شہری کو دو یا تین بار پروٹیکٹر جاری ہوا تو اسے بھی شامل کیا جاتا ہے، حکام نے بتایا اسلام آباد اور پنجاب میں اوورسیز پاکستانیز کے لئے عدالتوں کا قیام ہوچکا ہے۔

اوورسیز پاکستانیز کا پاکستان میں بیماری کی صورت میں مفت علاج ہوگا،اوورسیز پاکستانیز کو سیکیورٹی،رینٹ کار اور ہوٹلوں میں 50فیصد تک ڈسکائونٹ دیتے ہیں، حکام کے مطابق ہر سال اوورسیز پاکستانیز کا کنونشن پاکستان میں ہوگا ،کمیٹی رکن شہادت اعوان نے کہا اوورسیز پاکستانیوں کیلئے ہاسنگ سوسائٹی کی سکیم سندھ، بلوچستان اور کے پی میں نہیں، اسلام آباد اور لاہور میں بھی ہاسنگ اسکیمیں زیر التوا ہیں، کمیٹی نے تارکین وطن کیلئے جاری منصوبوں پر آئندہ اجلاس میں بریفنگ طلب کرلی۔

حکام نے امیگریشن کے مختلف مسائل پر روشنی ڈالتے ہوبے تایا کہ مالی سال 2025-26ء میں زرمبادلہ 42.5بلین ڈالر تک پہنچنے کی توقع ہے۔ انہوں نے بتایا کہ متحدہ عرب امارات، عمان اور ملائیشیا کی جانب سے غیر اعلانیہ پابندیاں ویزے میں مشکلات کا باعث بن رہی ہیں۔ای او بی آئی کے ڈپٹی ڈائریکٹر جنرل محمد امین نے کمیٹی کو بریفنگ دیتے ہوئے بتایا کہ ای او بی آئی کو سابق وزیر اعظم ذوالفقار علی بھٹو نے 1976 میں قائم کیا تھا۔

انہوں نے بتایا کہ ای او بی آئی اس وقت کم از کم پنشن 11,500اور زیادہ سے زیادہ پنشن 32ہزار روپے فراہم کر رہا ہے جو قابل بیمہ ملازمت اور ریٹائرمنٹ کے وقت ملازم کی عمر پر منحصر ہے۔اجلاس کو بتایا گیا کہ 31جولائی 2025ء تک ای او بی آئی کا کل سرمایہ کاری پورٹ فولیو 643.59ارب روپے تھا۔ انہوں نے بتایا کہ ای او بی آئی کی رئیل اسٹیٹ، سرکاری سکیورٹیز اور ایکویٹی میں سرمایہ کاری ہے اور عمارتوں اور جائیدادوں میں بہت سی سرمایہ کاری بہت پہلے کی گئی تھی۔

سرمایہ کاری کے فیصلے بورڈ آف ٹرسٹیز کرتے ہیں۔انہوں نے بتایا کہ گزشتہ سال ای او بی آئی میں 432,000نئے افراد کا اضافہ کیا گیا جبکہ 48,000نئے پنشنرز رجسٹرڈ ہوئے۔ انہوں نے بتایا کہ اس طرح 2024-25میں ای او بی آئی کی آمدنی میں اضافہ ہوا۔گزشتہ سال 2024-25میں ای او بی آئی کی کل آمدن 159.66ارب روپے تھی جو 2023-24ء کی127.79ارب روپے کے مقابلے میں 24.93ارب روپے زیادہ رہی۔