سپیکر قومی اسمبلی سردار ایاز صادق کی چین کے نئے سال کے موقع پر چین کی قیادت اور عوام کو دلی مبارکباد

منگل 17 فروری 2026 22:35

اسلام آباد(اُردو پوائنٹ اخبارتازہ ترین - این این آئی۔ 17 فروری2026ء) سپیکر قومی اسمبلی سردار ایاز صادق نے چین کے نئے سال کے موقع پر چین کی قیادت اور عوام کو دلی مبارکباد دی ہے۔ منگل کو اپنے تہنیتی پیغام میں انہوں نے چینی صدر شی جن پنگ، نیشنل پیپلز کانگریس (این پی سی)کی قائمہ کمیٹی کے چیئرمین زا لیجی اور چینی عوام کے لئے نیک خواہشات کا اظہار کرتے ہوئے کہا کہ نیا سال چین کے لئے امن، ترقی اور خوشحالی کا سال ثابت ہو گا۔

سپیکر قومی اسمبلی نے کہا کہ پاکستان اور چین کے درمیان تعلقات باہمی اعتماد اور سٹریٹجک شراکت داری پر مبنی ہیں جو ہر گزرتے وقت کے ساتھ مزید مستحکم ہو رہے ہیں۔ انہوں نے اس امید کا اظہار کیا کہ نیا سال دونوں ممالک کے درمیان پارلیمانی روابط، اقتصادی تعاون اور عوامی سطح پر تعلقات کو مزید فروغ دے گا۔

(جاری ہے)

انہوں نے چینی عوام کی کامیابی اور مسلسل ترقی کے لئے نیک تمناؤں کا اظہار کرتے ہوئے کہا کہ پاکستان کی پارلیمان چین کے ساتھ اپنے دوستانہ تعلقات کو قدر کی نگاہ سے دیکھتی ہے۔

انہوں نے کہا کہ دونوں ممالک کے مابین قائم دوستی ہر گزرتے دن کے ساتھ مزید مضبوط اور مستحکم ہوتی جا رہی ہے۔ انہوں نے کہا کہ پاک-چین اقتصادی راہداری منصوبہ خطے کی ترقی اور خوشحالی کا منصوبہ ہے ،اس منصوبے کی تکمیل سے خطے میں ترقی اور خوشحالی کے نئے دور کا آغاز ہو گا جس سے عوام کے معیار زندگی میں مزید بہتری آئے گی۔انہوں نے کہا کہ چین پاکستان کے دکھ سکھ کا ساتھی ہے،چین نے ہر مشکل وقت میں پاکستان کا ساتھ دیا،چین نے علاقائی اور بین الاقوامی سطح پر ہمیشہ پاکستان کے موقف کی تائید کی ہے۔انہوں نے کہا کہ پاکستان چین کے ساتھ اپنی سدا بہار دوستی پر فخر محسوس کرتا ہے۔