دفاع پاکستان کونسل کے تحت ملک بھر کی طرح کراچی میں یوم دفاع پاکستان منایا گیا

جمعہ 27 مارچ 2026 23:08

کراچی (اُردو پوائنٹ اخبارتازہ ترین - این این آئی۔ 27 مارچ2026ء) دفاع پاکستان کونسل کے تحت جمعہ کو ملک بھر کی طرح کراچی میں یوم دفاع پاکستان منایا گیا۔علما کرام نے کئی مساجد میں ملک میں حالیہ صورتحال، قومی یکجہتی اور امن و استحکام کے حوالے سے خطبات دیے۔علما کرام نے کہا کہ اسلام امن، بھائی چارہ اور اتحاد کا درس دیتا ہے، لہذا ہر قسم کے انتشار، فساد اور تشدد سے اجتناب کیا جائے۔

حالیہ واقعات میں ملکی املاک کو نقصان پہنچانے کے عمل کی شدید مذمت کی جائے اور اسے شرعی و قومی لحاظ سے غلط قرار دیا جائے۔عوام الناس کو آگاہ کیا جاتا یے کہ بعض عناصر دانستہ یا نادانستہ طور پر ایسے بیانیے کو فروغ دے رہے ہیں جو بیرونی مفادات کے لیے فائدہ مند ہو سکتا ہے، اس لیے ہر خبر اور بات کو تحقیق کے بعد ہی قبول کیا جائے۔

(جاری ہے)

پاکستان کی حالیہ کامیابیوں اور عالمی سطح پر بڑھتی ہوئی اہمیت پر روشنی ڈالی جائے، اور یہ واضح کیا جائے کہ ملک کی مضبوط ہوتی حیثیت بعض حلقوں کو ناگوار گزر رہی ہے۔

ریاستی اداروں اور قومی سلامتی کے معاملات میں ذمہ دارانہ رویہ اختیار کرنے کی تلقین کی جائیاور کسی بھی قسم کے منفی یا اشتعال انگیز پروپیگنڈا سے دور رہنے کی ہدایت دی جائے۔ ملک میں انتشار پھیلانے والوں کے خلاف غداری کے مقدمات درج کرکے قرار واقعی سزا دی جائے۔انہوں نے کہا کہ ہمارے لیے سب سے پہلے پاکستان ہے کسی ملک کے مسئلے میں پاکستان میں احتجاج کے نام پر فتنہ فساد ملک و ملت ریاست کے اداروں کے حوالے سے منفی گفتگو کی مزمت کرتے ہیں۔

جمعہ کے اجتماعات میں پاکستان کی سلامتی، استحکام، افواجِ پاکستان اور قومی یکجہتی کے لیے خصوصی دعا کا اہتمام کیا گیا۔دعا میں کہا گیا کہ تمام حضرات کا مثبت کردار معاشرے میں امن، شعور اور اتحاد کو فروغ دینے میں کلیدی حیثیت رکھتا ہے۔اللہ تعالی پاکستان کو امن، استحکام اور ترقی عطا فرمائے۔