شاہ انس نورانی اور شاہ اویس نورانی کی قیادت میں عرسِ امام نورانی کی مرکزی تقریب

علما و مشائخ اور عوام کی بڑی تعداد کی عرس تقریب میں شرکت۔عقیدہ ختمِ نبوت کے تحفظ میں امام نورانی کی خدمات کو خراجِ عقیدت پیش کیا گیا

پیر 6 اپریل 2026 18:25

کراچی(اُردو پوائنٹ اخبارتازہ ترین - این این آئی۔ 06 اپریل2026ء) کراچی میں گزشتہ شب قائدِ ملت اسلامیہ حضرت شاہ احمد نورانی صدیقی میرٹھی رحم اللہ علیہ کے عرس کے موقع پر ایک پروقار تقریب کا انعقاد کیا گیا، جس میں مختلف دینی و سیاسی شخصیات، علما و مشائخ اور عوام کی کثیر تعداد نے شرکت کی۔تقریب کی قیادت عالمی مبلغِ اسلام شاہ انس نورانی (مسند نشین و صدر ورلڈ اسلامک مشن)اور شاہ اویس نورانی (صدر جمعیت علمائے پاکستان)نے کی۔

اس موقع پر ملک بھر سے کارکنان اور عقیدت مندوں کی بڑی تعداد موجود تھی۔تقریب سے خطاب کرتے ہوئے علامہ مفتی عاصم صدیقی نے حضرت شاہ احمد نورانی صدیقی میرٹھی رحم اللہ علیہ کے مشن پر سیر حاصل گفتگو کرتے ہوئے کہا کہ مشنِ نورانی کو عہدِ حاضر کے تقاضوں سے ہم آہنگ کرتے ہوئے مزید مضبوط اور مثر انداز میں جاری رکھنے کی ضرورت ہے۔

(جاری ہے)

انہوں نے کہا کہ موجودہ طاغوتی طاقتوں کے مقابلے کے لیے واضح لائحہ عمل اور منظم جدوجہد وقت کی اہم ضرورت بن چکی ہے۔

انہوں نے عقیدہ ختمِ نبوت کے تحفظ کے لیے حضرت شاہ احمد نورانی صدیقی رحم اللہ علیہ کی گراں قدر خدمات کو خراجِ تحسین پیش کرتے ہوئے کہا کہ اس مشن کو مزید مضبوط بنانے کے لیے علما اور عوام کو متحد ہو کر کردار ادا کرنا ہوگا۔تقریب سے خطاب کرتے ہوئے علامہ مفتی نور احمد سیال نے جمعیت علمائے پاکستان کے تابناک ماضی پر روشنی ڈالتے ہوئے کہا کہ امام نورانی نے پاکستان کی سیاست میں نظریاتی اور اصولی سیاست کو فروغ دیا۔

انہوں نے کہا کہ اکابرین کے افکار اور مشن کو موجودہ حالات میں مزید آگے بڑھانے کی ضرورت ہے۔تقریب میں عوام کا ایک عظیم جمِ غفیر موجود تھا جبکہ شرکا نے حضرت شاہ احمد نورانی صدیقی میرٹھی رحم اللہ علیہ کی دینی، ملی اور سیاسی خدمات کو خراجِ عقیدت پیش کرتے ہوئے ان کے مشن کو جاری رکھنے کے عزم کا اظہار کیا۔