''معرکہ حق ''پاکستان کی عزت، غیرت اور خودمختاری کی روشن علامت ہے، ملک محمد احمد خاں

بدھ 6 مئی 2026 19:37

لاہور (اُردو پوائنٹ اخبارتازہ ترین - اے پی پی۔ 06 مئی2026ء) سپیکر پنجاب اسمبلی ملک محمد احمد خاں نے کہا ہے کہ معرکہ حق محض ایک جنگی کامیابی نہیں بلکہ پاکستان کی عزت، غیرت، خودمختاری اور قومی وقار کی روشن علامت ہے۔ ٹاون ہال لاہور میں منعقدہ تقریب سے خطاب کرتے ہوئے انہوں نے کہا کہ معرکہ حق نے دنیا پر واضح کر دیا کہ پاکستان ایک ذمہ دار مگر غیرت مند ریاست ہے جو امن کو ترجیح دیتی ہے لیکن اپنی سلامتی اور خودمختاری پر کسی قسم کا سمجھوتہ نہیں کرتی۔

انہوں نے کہا کہ معرکہ حق نے یہ ثابت کیا کہ سچ اور حق پر مبنی موقف کبھی کمزور نہیں ہوتا بلکہ وقت کے ساتھ مزید مضبوط ہوتا ہے۔ انہوں نے کہا کہ پاکستان نے دہشت گردی کے خلاف جنگ میں ایک لاکھ سے زائد قربانیاں دی ہیں، اس کے باوجود پاکستان پر بے بنیاد الزامات عائد کرنا کھلی ناانصافی ہے۔

(جاری ہے)

انہوں نے کہا کہ کسی بھی الزام کو شواہد کی بنیاد پر لگایا جانا چاہیے، تاہم بھارت آج تک پاکستان پر عائد کیے گئے الزامات کے حق میں کوئی ثبوت پیش نہیں کر سکا۔

انہوں نے مزید کہا کہ معرکہ حق قوم کے اتحاد، افواجِ پاکستان کی پیشہ ورانہ مہارت اور مضبوط قیادت کی عکاسی کرتا ہے۔ سپیکر ملک محمد احمد خاں نے افواجِ پاکستان کو خراجِ تحسین پیش کرتے ہوئے کہا کہ فیلڈ مارشل سید عاصم منیر کی پیشہ ورانہ قیادت میں مسلح افواج نے جرات اور مہارت سے دشمن کو واضح شکست دیتے ہوئے پیغام دیا کہ پاکستان کی خودمختاری پر کوئی سمجھوتہ نہیں ہوگا۔

انہوں نے کہا کہ پاکستان نے ہمیشہ ذمہ دار ریاست کے طور پر سفارتی محاذ کو ترجیح دی۔ وزیر اعظم محمد شہباز شریف کی قیادت میں پاکستان نے سفارت کاری کے محاز پر بھی تاریخی کامیابی حاصل کیں۔سپیکر نے وزیر اعلیٰ پنجاب کے ستھرا پنجاب پروگرام کو سراہتے ہوئے کہا کہ یہ اقدام نہ صرف صوبے بھر میں صفائی کے نظام کو بہتر بنانے کی عملی کاوش ہے بلکہ ایک صحت مند اور مہذب معاشرے کے قیام کی جانب اہم پیش رفت ہے۔

انہوں نے پاکستانی میڈیا کے کردار کو سراہتے ہوئے کہا کہ قومی بیانیہ پیش کرنے میں میڈیا نے ذمہ داری کا مظاہرہ کیا جبکہ پاکستان کی دفاعی صلاحیتوں نے دشمن کو واضح پیغام دیا کہ ملکی خودمختاری ہر قیمت پر محفوظ ہے۔ تقریب میں ممبر صوبائی اسمبلی چودھری امجد علی جاوید اور شہر بانو، سابق ڈپٹی مئیر اعجاز حفیظ، حسنین حیدر کاظمی، چیئرمین محبوب بھٹی، صدر عنصر ڈوگر سمیت ورکرز کی کثیر تعداد نے شرکت کی۔