’’معرکہ حق“ میں پاکستان کی عظیم کامیابی وزیر اعظم شہباز شریف اور فیلڈ مارشل سید عاصم منیر کی مربوط قیادت سے ممکن ہوئی ہے، چیئرمین وزیراعظم یوتھ پروگرام کا انٹرویو

اسلام آباد (اُردو پوائنٹ اخبارتازہ ترین - اے پی پی۔ 07 مئی2026ء) چیئرمین وزیراعظم یوتھ پروگرام رانا مشہود احمد خاں نے کہا ہے کہ ’’معرکہ حق“ میں پاکستان کی عظیم کامیابی وزیر اعظم شہباز شریف اور فیلڈ مارشل سید عاصم منیر کی مربوط قیادت سے ممکن ہوئی ہے، جن کی تیز رفتار فیصلہ سازی، سٹریٹجک تحمل اور متحدہ چین آف کمانڈ سے ملک بھارت کی جارحیت کو ناکام بنانے میں کامیاب ہوا اور عالمی سطح پر ایک ذمہ دار جوہری ریاست کے طور پر ابھرا۔

جمعرات کو ’’معرکہ حق‘‘ کی فتح کی پہلی سالگرہ کے موقع پر ’’اے پی پی ‘‘کو خصوصی انٹرویو میں رانا مشہود احمد خاں نے کہا کہ پاکستان نے بھارت کو زیادہ عسکری نقصان پہنچانے کی صلاحیت رکھنے کے باوجود نظم و ضبط، پیشہ وارانہ مہارت اور تحمل کو برقرار رکھتے ہوئے ہر بدلتی ہوئی علاقائی صورتحال کا فیصلہ کن جواب دیا۔

(جاری ہے)

انہوں نے کہا کہ وزیراعظم شہباز شریف نے شروع سے ہی دنیا کے سامنے حقائق پیش کرنے کے لئے آزاد بین الاقوامی تحقیقات کا مطالبہ کیا تھا اور اس بات پر زور دیا کہ پاکستان کبھی بھی جارحیت یا دہشت گردی کی حمایت نہیں کرتا بلکہ اپنی خودمختاری اور علاقائی سالمیت کے دفاع کا حق محفوظ رکھتا ہے۔

انہوں نے کہا کہ پاکستان بھارت کے خلاف جنگ میں اس لئے کامیاب ہوا کیونکہ دنیا نے ایک ذمہ دار قوم کو برتری کے باوجود تحمل کا مظاہرہ کرتے ہوئے دیکھا۔ انہوں نے مزید کہا کہ ملک کی مسلح افواج، پائلٹس اور نوجوانوں نے جنگ کے دوران غیر معمولی پیشہ وارانہ مہارت کا مظاہرہ کیا۔ رانا مشہود احمد خاں نے کہا کہ پاکستان کی دفاعی صلاحیتوں نے بھارت کی تکنیکی برتری کے تاثر کو خاک میں ملا دیا، پاکستانی نوجوانوں نے جدید جنگ، سائبر صلاحیتوں اور جدید ٹیکنالوجی میں اپنی طاقت کا ثبوت دیا۔

چیئرمین وزیراعظم یوتھ پروگرام نے مزید کہا کہ پاکستان نے ایٹمی طاقت ہونے کے باوجود جان بوجھ کر کشیدگی میں اضافے سے گریز کیا۔ایک سوال کے جواب میں انہوں نے کہا کہ جنگ کے نتیجہ میں قومی اتحاد مزید مضبوط ہوا ہے، دشمن عناصر کو مایوسی ہوئی ہے کیونکہ وہ سمجھتے تھے کہ اندرونی تقسیم پاکستان کو بیرونی خطرات سے پہلے کمزور کر سکتی ہے۔تحریک پاکستان، 1948، 1965 اور 1971 کی جنگوں میں دی گئی قربانیوں کو یاد کرتے ہوئے انہوں نے کہا کہ قربانی اور حب الوطنی کا جذبہ قوم میں بہت گہرا ہے اور اسے کبھی شکست نہیں دی جا سکتی۔

انہوں نے کہا کہ حکومت اب وزیراعظم یوتھ پروگرام کے تحت مصنوعی ذہانت ، آئی ٹی اور ٹیکنیکل ایجوکیشن کے اقدامات کے ذریعے ملک کے نوجوانوں کو ایک تکنیکی قوت میں تبدیل کرنے پر زیادہ توجہ دے رہی ہے۔انہوں نے کہا کہ پاکستان نے پہلے ہی یکساں متحد اے آئی نصاب تیار کیا ہے اور سیمی کنڈکٹرز اور ابھرتی ہوئی ٹیکنالوجیز سے متعلق پالیسیاں متعارف کرائی ہیں جس سے پاکستان ان ممالک میں شامل ہو گیا ہے جو نوجوانوں کو مستقبل کے تکنیکی چیلنجوں کے لئے فعال طور پر تیار کر رہے ہیں۔

انہوں نے کہا کہ ہماری توجہ نوجوانوں کو مثبت انداز میں شامل کرنا، انہیں جدید ہنر سے آراستہ کرنا اور انہیں عالمی سطح پر مقابلہ کرنے کے مواقع فراہم کرنے پر مرکوز ہے۔ انہوں نے مزید کہا کہ وزیراعظم شہباز شریف نے یوتھ پروگرام میں نوجوانوں کو بااختیار بنانے کے لئے دن رات کام کرنے کی ہدایت کی تھی۔پاکستان کی مسلح افواج اور شہداء کو زبردست خراج تحسین پیش کرتے ہوئے انہوں نے کہا کہ قوم کو ملک کے امن اور خودمختاری کی حفاظت کرنے والے جوانوں کی قربانیوں پر فخر ہے۔انہوں نے مزید کہا کہ جب تک ایسے بہادر نوجوان ملک کی سرحدوں پر کھڑے ہیں پاکستان کی ترقی کو کوئی طاقت نہیں روک سکتی۔\395\932