معرکۂ حق بنیان مرصوص قومی اتحاد اور عسکری برتری کی روشن مثال ہے، احسن بختاوری، احسن ظفر بختاوری

ہفتہ 9 مئی 2026 19:40

اسلام آباد (اُردو پوائنٹ اخبارتازہ ترین - اے پی پی۔ 09 مئی2026ء) آذر بائیجان پاکستان جوائنٹ چیمبر آف کامرس اینڈ انڈسٹری کے سرپرست اعلیٰ احسن ظفر بختاوری نے کہا ہے معرکۂ حق بنیان مرصوص نہ صرف پاکستان کی عسکری تاریخ کا ایک سنہری باب ہے بلکہ قومی اتحاد، جرات اور غیر متزلزل عزم کی روشن مثال بھی ہے، اس نازک گھڑی میں پوری قوم اپنی بہادر افواج کے شانہ بشانہ کھڑی رہی اور دشمن کو واضح پیغام دیا کہ پاکستان کی خودمختاری پر کوئی سمجھوتہ ممکن نہیں۔

معرکہ حق کے ایک سال مکمل ہونے پر اپنے بیان میں احسن بختاوری نے کہا کہ پاک فوج نے پیشہ ورانہ مہارت، بروقت حکمت عملی اور بے مثال جرات کا مظاہرہ کرتے ہوئے دشمن کے ناپاک عزائم کو خاک میں ملا دیا۔ فیلڈ مارشل عاصم منیر کی مدبرانہ قیادت اور دلیرانہ فیصلوں نے اس معرکے میں فیصلہ کن کردار ادا کیا جبکہ وزیر اعظم شہباز شریف کی سیاسی بصیرت اور قومی یکجہتی کے فروغ نے ریاستی سطح پر مضبوط قیادت فراہم کی۔

(جاری ہے)

احسن بختاوری نے کہا کہ بھارتی جارحیت کے دوران قوم کا جذبہ قابلِ رشک تھا، ہر شہری نے اتحاد اور حب الوطنی کی مثال قائم کی۔ پاک فضائیہ نے دشمن کے غرور کو خاک میں ملاتے ہوئے جدید جنگی طیاروں سمیت رافیل طیاروں کو نشانہ بنا کر اپنی برتری ثابت کی۔ دشمن کو منہ توڑ جواب ملا اور وہ پسپائی اختیار کرنے پر مجبور ہوا، جو اس کی ناکامی کا واضح ثبوت ہے۔انہوں نے کہا کہ یہ معرکہ اس حقیقت کی یاد دہانی ہے کہ پاکستان کی دفاعی صلاحیتیں ناقابلِ تسخیر ہیں اور ہماری افواج ہر قسم کی جارحیت کا بھرپور جواب دینے کی مکمل صلاحیت رکھتی ہیں، ہمیں اس کامیابی کو یاد رکھتے ہوئے قومی یکجہتی کو مزید مضبوط بنانا ہوگا اور ملک کی ترقی و استحکام کیلئے مشترکہ کاوشیں جاری رکھنی ہوں گی۔