Live Updates

ایران جنگ کے باعث روس کی تیل و گیس کی آمدن میں اپریل کے دوران 39 فیصد اضافہ

منگل 12 مئی 2026 10:13

ماسکو (اُردو پوائنٹ اخبارتازہ ترین - اے پی پی۔ 12 مئی2026ء) روس کی وزارتِ خزانہ کے اعداد و شمار کے مطابق اپریل 2026 میں روس کی تیل اور گیس سے حاصل ہونے والی آمدن میں 39 فیصد اضافہ ہوا۔ بی بی سی نے روسی اخبار کومرسانت کے حوالہ سے بتایا کہ یہ پہلا ماہانہ اضافہ ہے جو ایران جنگ کے باعث دیکھا گیا۔ مارچ میں روسی خام تیل یورالز کروڈ کی قیمت 77 ڈالر فی بیرل تک پہنچ گئی، اپریل میں روسی تیل کی اوسط قیمت 94.9 ڈالر فی بیرل رہی۔

2026 کے پہلے چار ماہ کے دوران 2025 کے اسی عرصے کے مقابلے میں روس کی تیل و گیس آمدن میں مجموعی کمی بدستور موجود ہے، لیکن توقع ہے کہ آنے والے ہفتوں میں روس کی تیل و گیس سے آمدن میں تیزی سےاضافہ ہو گا۔ مارچ اور اپریل دونوں میں روسی خام تیل کی اوسط قیمت 2026 کے بجٹ میں مقرر کردہ 59 ڈالر فی بیرل سے نمایاں طور پر زیادہ رہی۔

(جاری ہے)

روس کی اقتصادی ترقی کی وزارت کے ماہانہ اعداد و شمار کے مطابق پہلے چار مہینوں میں یورالز کروڈ کی اوسط قیمت بھی اس سطح سے زیادہ، یعنی 64.4 ڈالر فی بیرل رہی۔

جنوری سے اپریل 2026 کے دوران روس کی تیل و گیس کی فروخت سے آمدن 2,298 ارب روبل ریکارڈ کی گئی جو 2025 کے اسی عرصے کی آمدن 3,727 ارب روبل کے مقابلے میں 38 فیصد کم ہے تاہم توقع ہے کہ یہ فرق کم ہو جائے گا کیونکہ گزشتہ سال اپریل سے روسی خام تیل کی قیمتیں گرنا شروع ہو گئی تھیں اور دسمبر میں 39.2 ڈالر فی بیرل تک پہنچ گئی تھیں لیکن اب ان میں اضافے کا رجحان دیکھا جار رہا ہے۔