پاکستان کی سب سے بڑی کوکین ڈیلر انمول عرف پنکی کی پروٹوکول کے ساتھ بغیر ہتھکڑی عدالت میں پیشی

سنگین جرم میں ملوث اور انتہائی مطلوب ملزمہ کی عدالت میں پیشی کے دوران پولیس کی جانب سے ملزمہ کے ساتھ کیے جانے والے برتاؤ نے دیکھنے والوں کو حیرت میں ڈال دیا

ساجد علی منگل 12 مئی 2026 16:06

پاکستان کی سب سے بڑی کوکین ڈیلر انمول عرف پنکی کی پروٹوکول کے ساتھ بغیر ..

کراچی (اُردو پوائنٹ اخبارتازہ ترین۔ 12 مئی2026ء) پاکستان کی سب سے بڑی کوکین میکر اور ڈیلر کے طور پر جانی جانے والی ملزمہ انمول عرف پنکی کو گرفتاری کے بعد کراچی کی مقامی عدالت میں پیش کر دیا گیا۔ تفصیلات کے مطابق گارڈن پولیس کے ہاتھوں گرفتار ہونے والی پاکستان کی کوکین سپلائر انمول عرف پنکی کو تفتیشی حکام نے عدالت میں پیش کیا، تاہم اس موقع پر پولیس کی جانب سے ملزمہ کے ساتھ کیے جانے والے برتاؤ نے دیکھنے والوں کو حیرت میں ڈال دیا۔

اے آر وائی نیوز نے رپورٹ کیا ہے کہ ایک سنگین جرم میں ملوث اور انتہائی مطلوب ملزمہ کو عدالت میں پیشی کے دوران ہتھکڑی نہیں لگائی گئی تھی، عدالت کے احاطے میں کوکین ڈیلر پنکی اعتماد کے ساتھ آگے آگے چلتی رہی، جبکہ تفتیشی افسر اس کے پیچھے پیچھے چل کر ملزملہ کو راستہ بتاتے ہوئے نظر آیا۔

(جاری ہے)

پاکستان کی سب سے بڑی کوکین ڈیلر انمول عرف پنکی کی گرفتاری اور عدالت میں پیشی#ARYNews #BreakingNews pic.twitter.com/mF0ttv97zN
— ARY NEWS (@ARYNEWSOFFICIAL) May 12, 2026

یاد رہے کہ صوبہ سندھ کے دارالحکومت کراچی کے علاقہ گارڈن میں پولیس اور حساس ادارے نے ایک مشترکہ کارروائی کرتے ہوئے منشیات کی دنیا کی ایک بڑی ملزمہ کو گرفتار کیا، انمول عرف پنکی نامی یہ خاتون ناصرف منشیات سپلائی کرتی تھی بلکہ پاکستان کی سب سے بڑی کوکین میکر کے طور پر اپنا پروڈکشن یونٹ بھی چلا رہی تھی، گارڈن پولیس نے وفاقی حساس ادارے کی نشان دہی پر ایک کامیاب چھاپہ مار کر انتہائی مطلوب ملزمہ انمول عرف پنکی کو گرفتار کیا۔

بتایا جارہا ہے کہ ملزمہ کے قبضے سے کروڑوں روپے مالیت کی تیار اور نیم تیار کوکین، کیمیکلز اور اسلحہ برآمد ہوا، گرفتار ملزمہ محض مڈل پاس ہے لیکن وہ کوکین تیار کرنے کے پیچیدہ عمل میں ماہر ہے، وہ ایک چلتی پھرتی لیب کی مالک ہے جہاں وہ مختلف کیمیلز کی مدد سے کوکین کی مقدار کو بڑھاتی اور اسے مہنگے داموں فروخت کرتی تھی، پنکی کی تیار کردہ کوکین عام مارکیٹ سے کئی گنا مہنگی ہے، وہ 300 گرام کوکین کو مختلف ملاوٹ کے ذریعے 1 کلو میں تبدیل کر دیتی ہے، عام کوکین 8 سے 10 ہزار روپے گرام ہے، جبکہ پنکی کی وائٹ کوک 25 ہزار اور گولڈن کوک 40 ہزار روپے فی گرام میں فروخت ہوتی تھی، اس کے قبضے سے ملنے والے ایک 'کوکین ایگ' کی قیمت 8 لاکھ روپے سے زائد بتائی جاتی ہے۔