انمول پنکی نے کوکین بنانے کا طریقہ انٹرنیٹ سے سیکھا، بعد میں اپنا برانڈ بنا لیا

2 بھائیوں کو بھی ماضی میں گرفتار کیا گیا، ملزمہ کا قتل کے ایک مقدمے میں بھی نامزد ہونے کا انکشاف

محمد علی بدھ 13 مئی 2026 00:00

کراچی (اردوپوائنٹ اخبار تازہ ترین ۔ 12 مئی 2026ء ) انمول پنکی نے کوکین بنانے کا طریقہ انٹرنیٹ سے سیکھا، بعد میں اپنا برانڈ بنا لیا، 2 بھائیوں کو بھی ماضی میں گرفتار کیا گیا، ملزمہ کا قتل کے ایک مقدمے میں بھی نامزد ہونے کا انکشاف۔ میڈیا رپورٹس کے مطابق پنکی 14سال کی عمر میں گھر سے ماڈل بننے کیلئے نکلی اور پارٹیوں میں جانا شروع کیا۔ انمول عرف پنکی کی وکیل سے شادی ہوئی جو عالمی کوکین گینگ میں کام کرتا تھا، شادی کے بعد انمول عرف پنکی نے کوکین کا کام شوہر کے ساتھ شروع کیا۔

انمول پنکی نے وکیل شوہر سے طلاق کے بعد پولیس افسر سے شادی کی۔ پنکی نے تین بھائیوں کی مدد سے کوکین کا نیٹ ورک قائم کیا اور ڈیلر بن گئی، انمول نے کوکین بنانے کا طریقہ انٹرنیٹ سے سیکھااور بعد میں اپنا برانڈ بنا لیا۔

(جاری ہے)

پنکی کو 5سال قبل پنجاب پولیس نے گرفتار کیا، مبینہ طور پر 7کروڑ روپے رشوت لے کر چھوڑ دیا گیا۔پنکی لاہور سے دو خواتین کے ذریعے ٹرین سے کوکین کے 5 پیکٹ کراچی بھیجتی تھی۔

کراچی اسٹیشن سے بائیک رائیڈرز منشیات کے الگ الگ پیکٹ لے کر ڈیلرز تک پہنچاتے تھے، ڈیلرز کی مدد سے کوکین شہریوں کو بھیجی جاتی اور پیسے اکاؤنٹ سے ٹرانسفر ہوتے تھے۔ ملزمہ انمول عرف پنکی کے نیٹ ورک میں کوئی ایک دوسرے سے نہیں ملتا تھا۔ ملزمہ انمول پنکی نے گلگت میں ایک ہوٹل بھی بنا رکھا ہے۔پنکی کے گروپ میں اس کے بھائی ناصر کی گرل فرینڈ بھی شامل ہے۔

پنکی اپنے بھائی کی گرل فرینڈ کی مدد سے کراچی کی پارٹیوں میں کوکین سپلائی کرتی رہی۔ماضی میں ملزمہ انمول کے دو بھائیوں کو کراچی پولیس گرفتار کرچکی ہے۔ ملزمہ انمول پنکی کوکین سے ماہانہ کروڑوں روپے کماتی ہے۔ دوسری جانب ڈرگ کوئین پنکی کو پروٹوکول دینے والے گارڈن پولیس کے افسران کو معطل کردیا گیا۔ ایڈیشنل آئی جی کراچی نے پولیس افسران کو معطل کرنے کے احکامات جاری کئے۔