پاکستان بزنس کونسل دبئی کا AI پر خصوصی سیشن، نوجوان کاروباری افراد کو جدید ٹیکنالوجی سے ہم آہنگ ہونے کی ترغیب

اعجاز احمد گوندل ہفتہ 16 مئی 2026 17:36

دبئی: پاکستان بزنس کونسل دبئی (PBC Dubai) نے HUB 7، جے ایل ٹی میں اپنی ینگ انٹرپرینیورز انیشی ایٹو کے تحت ایک کامیاب اور معلوماتی سیشن کا انعقاد کیا، جس میں نوجوان کاروباری افراد، پروفیشنلز اور بزنس کمیونٹی سے تعلق رکھنے والے افراد نے بھرپور شرکت کی۔ سیشن کا موضوع “کاروباری ترقی میں آرٹیفیشل انٹیلیجنس (AI) کا کردار” تھا، جس میں ChatGPT، آٹومیشن سسٹمز اور دیگر AI ٹولز کے ذریعے کاروباری استعداد، کمیونیکیشن اور فیصلہ سازی کو بہتر بنانے کے عملی طریقے بیان کیے گئے۔

ورکشاپ محترم تابش زیدی نے پیش کی، جنہوں نے شرکاء کو عملی مثالوں اور لائیو ڈیمونسٹریشنز کے ذریعے AI کے مؤثر استعمال سے آگاہ کیا۔ شرکاء نے سوال و جواب اور عملی سرگرمیوں میں بھرپور دلچسپی لی اور اس اقدام کو جدید دور کی اہم ضرورت قرار دیا۔

(جاری ہے)

پاکستان بزنس کونسل دبئی کے وائس چیئرمین ایونٹس اینڈ میڈیا افتخار علی تتلہ نے اپنے خطاب میں نوجوان کاروباری افراد کی اہمیت پر زور دیتے ہوئے کہا کہ اس قسم کے تربیتی پروگرام نئی نسل کو سیکھنے، جدت اپنانے اور قیادت کے مواقع فراہم کرتے ہیں۔

تقریب میں چیئرمین پاکستان بزنس کونسل دبئی شبیر مرچنٹ نے بھی خصوصی شرکت کی اور ایسی سرگرمیوں کو بزنس کمیونٹی کے لیے مثبت پیش رفت قرار دیا۔ انہوں نے متحدہ عرب امارات کے کاروبار دوست ماحول کو سراہتے ہوئے اراکین کے درمیان روابط، تعاون اور آئیڈیاز کے تبادلے کی اہمیت پر زور دیا۔ تقریب کے اختتام پر شرکاء نے مستقبل میں بھی ایسے معلوماتی اور تربیتی پروگرامز کے انعقاد میں گہری دلچسپی کا اظہار کیا۔