ایک لاکھ سے زائد پاکستانی عازمین حج سعودی عرب پہنچ گئے

اتوار 17 مئی 2026 12:42

مکہ مکرمہ (اُردو پوائنٹ اخبارتازہ ترین - اے پی پی۔ 17 مئی2026ء) پاکستان کے مختلف شہروں سے ’’روٹ ٹو مکہ‘‘اور حج پروازوں کے ذریعے مجموعی طور پر اب تک ایک لاکھ سے زائد عازمینِ حج سعودی عرب پہنچ چکے ہیں ۔ ترجمان وزارت مذہبی امور کے مطابق ارضِ مقدس میں عازمین کی آمد کا سلسلہ تیزی سے جاری ہے اور اب صرف 18 فیصد (21,626) عازمینِ حج کا آنا باقی ہے ۔ انکا کہنا تھا کہ اب تک پاکستان سے مدینہ منورہ کے لیے 176 اور جدہ کے لیے 212 حج پروازیں لینڈ کر چکی ہیں ۔

سعودی عرب پہنچنے والے مجموعی عازمین میں سے 94 فیصد اس وقت مکہ مکرمہ میں موجود ہیں جبکہ 6 فیصد مدینہ منورہ میں قیام پذیر ہیں ۔ تازہ ترین اعداد و شمار کے مطابق پاکستان سے براہِ راست مدینہ منورہ پہنچنے والے عازمین کی تعداد 44,383 ہے ، جن میں سے 38,470 عازمین مدینہ منورہ میں اپنا قیام مکمل کر کے مکہ مکرمہ منتقل ہو چکے ہیں ۔

(جاری ہے)

اس کے علاوہ 52,825 عازمینِ حج پاکستان سے براہِ راست جدہ کے راستے مکہ مکرمہ پہنچے ہیں ۔

وزارتِ مذہبی امور کے ڈیٹا کے مطابق عازمینِ حج کی خدمت، رہنمائی اور طبی سہولیات کی فراہمی کے لیے ویلفیئر اسٹاف کی تعیناتی کا 97 فیصد کام مکمل ہو چکا ہے ۔ اب تک 98 فیصد معاونین حجاج ، 93 فیصد خدام (SDS) و ٹیکنیکل اسٹاف اور 99 فیصد میڈیکل عملہ سعودی عرب پہنچ کر اپنی ذمہ داریاں سنبھال چکا ہے۔ مسجد الحرام اور اس کے اطراف میں تعینات 'حرم گائیڈز' اب تک مجموعی طور پر 18,718 عازمینِ حج کی رہنمائی کر چکے ہیں ، جبکہ مدینہ منورہ میں اب تک مجموعی طور پر 37,106 عازمینِ حج کو ریاض الجنہ کی زیارت کرائی جا چکی ہے ۔

پاکستانی عازمین کو رہائش گاہوں سے حرم شریف تک عمرہ اور نمازوں کی ادائیگی کے لیے لانے اور لے جانے والی ٹرانسپورٹ سروس کو مزید فعال کر دیا گیا ہے ۔ مکہ مکرمہ میں عازمین کے لیے مجموعی طور پر بسوں کی تعداد بڑھا کر 446 کر دی گئی ہے ، جس کے ذریعے تمام ایک لاکھ عازمینِ حج کو 24 گھنٹے بہترین سفری سہولیات فراہم کی جا رہی ہیں ۔