جاوید رئیس کو صدارتی اعزاز “تمغۂ امتیاز” سے نوازے جانے پر میرپورخاص میں شاندار استقبالیہ تقریب

اتوار 17 مئی 2026 12:42

میرپورخاص (اُردو پوائنٹ اخبارتازہ ترین - اے پی پی۔ 17 مئی2026ء) حکومت پاکستان کی جانب سے افرادِ باہم معذورین (PWDs) کی فلاح و بہبود کے لیے نمایاں خدمات انجام دینے پر ڈس ایبلڈ ویلفیئر ایسوسی ایشن (DWA) کراچی کے صدر جاوید رئیس کو صدارتی اعزاز “تمغۂ امتیاز” سے نوازے جانے پر میرپورخاص میں شاندار استقبالیہ تقریب اور ریلی کا انعقاد کیا گیا۔ مقررین نے کہا کہ جاوید رئیس کو تمغۂ امتیاز ملنا دراصل خصوصی افراد کی خدمات کا قومی سطح پر اعتراف ہے، جبکہ اس اعزاز نے ملک بھر کے معذور افراد کا سر فخر سے بلند کر دیا ہے۔

ادارہ “گلستانِ معذورین” میرپورخاص میں جاوید رئیس کے اعزاز میں ایک پروقار تقریب منعقد کی گئی، جس کی قیادت ادارے کے سرپرست آفاق احمد خان، صدر قمرالدین ملک نے کی۔

(جاری ہے)

تقریب کے بعد شرکاء نے حیدرآباد روڈ پر سے ایک عظیم الشان ریلی بھی نکالی، جس میں خصوصی افراد نے بھرپور شرکت کی اور پاک فوج و پاکستان زندہ باد کے فلک شگاف نعرے لگائے۔ اس موقع پر گلستانِ معذورین کے سرپرست آفاق احمد خان نے جاوید رئیس کو پھولوں کا گلدستہ اور سندھ کی ثقافتی پہچان اجرک پیش کی، جبکہ صدر قمرالدین ملک، جے رام، صلاح الدین ملک اور دیگر ممبران نے بھی گلدستے اور پھولوں کے ہار پہنا کر ان کا پرتپاک استقبال کیا۔

تمغۂ امتیاز یافتہ جاوید رئیس نے صدرِ پاکستان آصف علی زرداری کا شکریہ ادا کرتے ہوئے کہا کہ پاکستان کی تاریخ میں پہلی مرتبہ کسی خصوصی فرد کو معذور افراد کی خدمات کے اعتراف میں تمغۂ امتیاز دیا گیا ہے۔ انہوں نے اس عزم کا اظہار کیا کہ وہ دن دور نہیں جب میرپورخاص کے گلستانِ معذورین کے نوجوان بھی اپنی صلاحیتوں اور محنت کے بل بوتے پر قومی اعزازات حاصل کریں گے۔

تقریب سے خطاب کرتے ہوئے سرپرست آفاق احمد خان نے کہا کہ آج ایک حقیقی خدمت گزار کو صدارتی اعزاز ملنے پر خصوصی افراد سمیت پوری قوم کا سر فخر سے بلند ہو گیا ہے۔ صدر گلستانِ معذورین قمرالدین ملک نے کہا کہ جاوید رئیس پاکستان بھر کے خصوصی افراد کے لیے رول ماڈل اور باعثِ فخر شخصیت ہیں۔ تقریب کے دوران آفاق احمد خان نے چیف آف آرمی اسٹاف فیلڈ مارشل عاصم منیر، وزیرِ اعظم شہباز شریف اور پاک افواج کو “معرکۂ حق” کی کامیابی کا ایک سال مکمل ہونے پر مبارکباد بھی پیش کی۔ خوشی کے اس یادگار موقع پر جاوید رئیس، آفاق احمد خان، قمرالدین ملک اور دیگر شرکاء نے خصوصی کیک کاٹا اور ایک دوسرے کو مبارکباد دی۔ \378