ایوان بالا میں متحدہ عرب امارت سے ہزاروں پاکستانیوں کی بے دخلی کا معاملہ کمیٹی کے سپرد کردیا گیا

اسلام آباد(اُردو پوائنٹ اخبارتازہ ترین - آن لائن۔ 21 مئی2026ء) ایوان بالا میں متحدہ عرب امارت سے ہزاروں پاکستانیوں کی بے دخلی کا معاملہ کمیٹی کے سپرد کردیا گیا۔جمعرات کو سینیٹ اجلاس کے موقع پر توجہ دلائو نوٹس پر بات کرتے ہوئے سینیٹر علامہ راجہ ناصر عباس نے کہاکہ اس وقت بیرون ممالک مقیم پاکستانی محنت کشوں کو بھی مشکلات درپیش ہیں اور متحدہ عرب امارات سے ہزاروں پاکستانیوں کو بے دخل کیا گیا ہے۔

انہوں نے کہاکہ اب تک تقریباً2ہزار کے قریب افراد کو بے دخل کیا گیا ہے اور ان کو شنوائی کا موقع بھی نہیں دیا گیا ہے جس کی وجہ سے ان کے اربوں روپے وہاں پر رہ گئے ہیں۔انہوں نے کہاکہ ہماری حکومت کو چاہیے کہ اس حوالے سے اقدامات اٹھائے اور ان پاکستانیوں کو جو پسماندہ علاقوں سے ہیں کے حقوق کا تحفظ کیا جائے۔

(جاری ہے)

انہوں نے وزرات خارجہ سے مطالبہ کیا کہ اس معاملے پر متحدہ عرب امارات کی حکومت سے اعلیٰ سطحی رابطہ کیا جائے اور وہاں پر زیر حراست پاکستانیوں کو قانونی معاونت فراہم کی جائے۔

معاملے پر مستقل سفارتی رابطہ کاری کو یقینی بنایا جائے اور ان کے بنیادی حقوق کا تحفظ کیا جائے۔انہوں نے کہاکہ گذشتہ پانچ سالوں کے دوران خلیجی ممالک سے 1لاکھ 64ہزار سے زائد پاکستانیوں کو بے دخل کیا گیا ہے جو کہ زیادتی ہے اس کانقصان نہ صرف پاکستان کو ہوگا بلکہ ہم سب کو ہوگا۔سینیٹر اعظم سواتی نے کہاکہ اس معاملے کی تحقیقات ضروری ہیں۔

انہوں نے کہاکہ عرب ممالک کے ساتھ پاکستان کے تعلقات بہت اچھے ہیں۔اگر وہاں سے ہمارے پاکستانی بے دخل ہوں تو یہ ذیادتی ہے۔ اس موقع پر وفاقی وزیر پارلیمانی امور ڈاکٹر طارق فضل چوہدری نے کہاکہ یہ مسئلہ سوشل میڈیا پر زیر بحث ہے۔انہوں نے کہاکہ متحدہ عرب امارات میں 20لاکھ سے زائد پاکستانی موجود ہیں اور حکومت کے ساتھ ہمارے دیرینہ تعلقات ہیں۔

انہوں نے کہاکہ امریکہ اور ایران کے تنازعے میں اب تک چار پاکستانیوں کی شہادت جبکہ 23پاکستانی زخمی ہوئے ہیں۔انہوں نے کہاکہ اب تک 3ہزار 494پاکستانی متحدہ عرب امارات سے ڈی پورٹ کیا گیا ہے اورجن لوگوں کے پاس ویزے موجود ہیں وہ آزادی کے ساتھ رہ رہے ہیں۔انہوں نے کہاکہ اس میں بہت سارے افراد مختلف جرائم میں جیلوں میں قید رہنے کے بعد ڈی پورٹ ہوئے ہیں۔

انہوں نے کہاکہ سوشل میڈیا پر جس طرح کے بہتان لگائے جاتے ہیں اس طرح کسی بھی ملک میں نہیں ہوتا ہے۔انہوں نے کہاکہ پاکستان کی طرح دیگر ممالک کے لوگ بھی ڈی پورٹ ہوئے ہیں اگر کسی نے کوئی جرم کیا ہو۔انہوں نے کہاکہ صرف پاکستانیوں کو ٹارگٹ نہیں کیا گیا ہے۔انہوں نے کہاکہ اس جنگ کی وجہ سے وہاں پر بہت سارے کاروبار اور کمپنیاں بند ہوئی ہیں۔انہوں نے کہاکہ متحدہ عرب امارات کے اپنے ضابطے ہیں تاہم وہاں پر پاکستانیوں کو سہولیات کی فراہمی کیلئے ہمارے سفارت خانے پوری طرح فعال ہیں۔اس موقع پر اپوزیشن لیڈر نے کہاکہ اس معاملے کو کمیٹی کے سپرد کیا جائے۔تاکہ مسائل کا حل نکالا جاسکے۔اس موقع پر چیرپرسن سینیٹر شیری رحمن نے معاملہ خارجہ کمیٹی کے سپر د کردیا۔۔۔۔اعجاز خان