Live Updates

اراکین سینیٹ کا مالی سال 2026-27 کے بجٹ میں صحت، تعلیم، زراعت سمیت دیگر شعبوں پر توجہ مرکوز کرنے کی ضرورت پرزور

بدھ 17 جون 2026 20:07

اسلام آباد (اُردو پوائنٹ اخبارتازہ ترین - اے پی پی۔ 17 جون2026ء) اراکین سینیٹ نے مالی سال 2026-27 کے بجٹ میں صحت، تعلیم، زراعت سمیت دیگر شعبوں پر توجہ مرکوز کرنے کی ضرورت پرزور دیا ہے۔ بدھ کو ایوان بالا کے اجلاس میں مالی سال 2026-27 کے بجٹ پر بحث میں حصہ لیتے ہوئے سینیٹر محمد عبدالقادرنے کہا کہ یہ بجٹ مشکل حالات میں بنایا گیا ہے، میکرو اکنامک اشاریے مثبت ہیں، حکومت معیشت کو درست سمت میں لے کر جا رہی ہے، گزشتہ دوتین سال سے ڈالر کا ریٹ مستحکم رہا ہے۔

افراط زر کو کنٹرول کیا گیا ہے تاہم بہت کچھ کرنے والا ہے، ہماری نوجوان آبادی 60فیصد ہے، اگر ہم نے انہیں صحیح رہنمائی دی تو یہ جی ڈی پی میں اضافہ کر سکتے ہیں، بصورت دیگر یہ ہمارے لیے بہت بڑا مسئلہ بن جائے گا۔ بجلی ہمارے ملک کا اہم ترین مسئلہ ہے۔

(جاری ہے)

کپیسٹی پیمنٹ چارجزکی ترقیاتی فنڈز سے زیادہ ادائیگی کی جارہی ہے۔ آئی پی پیزکا فرانزک آڈٹ کرائیں۔

سینیٹر اعظم سواتی نے کہا کہ مذاکرات کے ذریعے سیاسی معاملات حل کئے جائیں کیونکہ معاشی استحکام کے لیے سیاسی استحکام ناگزیر ہے، جس طرح پاکستان نے ایران امریکا جنگ میں ثالثی کا کردار ادا کیا ہے وہ قابل تعریف ہے، بلدیاتی ادارے فعال کئے جائیں۔ مولانا عبدالواسع نے کہا کہ بلوچستان اور خیبرپختونخوا کے عوام کو بنیادی سہولیات کی فراہمی یقینی بنائی جائے۔

این ایف سی ایوارڈ سے صوبوں کے حصوں سے کٹوتی نہ کی جائے۔سینیٹر پونجوبھیل نے کہا کہ بجٹ میں ریاست کو حقیقی ماں کا کردار ادا کرنا چاہیے،عام آدمی کو ریلیف فراہم کیا جائے۔صوبہ سندھ میں پانی کی کمی کے باعث قحط کی صورتحال ہے۔زرعی اجناس پر بھرپور توجہ دینے کی ضرورت ہے۔زرعی اصلاحات کی ضرورت ہے۔اٹھارویں ترمیم رول بیک نہیں کی جاسکتی۔ پاکستان ہماری ماں ہے اس کے لیے ہر قربانی کے لیے تیارہیں۔سینیٹر حامد خان نے کہا کہ ملکی قرضوں میں اضافہ ہو رہا ہے۔سیاسی استحکام کے بغیر معاشی استحکام نہیں آتا۔