Live Updates

سول ملٹری اسٹیبلشمنٹ کی سرپرستی میں قائم ہائبرڈ نظام ملک میں عدم استحکام کی جڑ ہے

ریاستی طاقت اور جبر سے امن واستحکام ممکن نہیں، بجلی، تیل، گیس پر حکومتی ٹیکسز کا نفاذ عوام پر بوجھ ہے، آزاد کشمیر میں پی ٹی آئی کی رجسٹریشن کیلئے ہائیکورٹ کا فیصلہ خوش آئند ہے، لیاقت بلوچ

ثنااللہ ناگرہ بدھ 24 جون 2026 22:43

لاہور (اردوپوائنٹ اخبار تازہ ترین۔ انٹرنیشنل پریس ایجنسی ۔24 جون 2026ء ) نائب امیر جماعتِ اسلامی، سیکرٹری جنرل ملی یکجہتی کونسل لیاقت بلوچ نے تقاریب سے خطاب کرتے ہوئے کہا کہ حسینیت اور یزیدیت حق و باطل کی واضح دائمی شاہراہ ہے. حسینیت اسلام کے دائمی اصولوں کے مطابق جنت کا راستہ اور یزیدیت اسلام سے بغاوت و انحراف کی بنیاد پر جہنم کی آگ کا راستہ ہے.

میدانِ کربلا کے شہداء امام عالی مقام حضرت حسین (رض) کی عظمت کو بیان کرنا، یاد کرنا ذہنی، فکری، اسلامی نظریاتی ضرورت ہے لیکن میدانِ کربلا کا اصل پیغام یہ ہے کہ ہر دور میں ملوکیت کا راستہ روکا جائے، عدل و انصاف کے نظام کے لئے جدوجہد کی جائے، انسانوں پر انسانوں کی بالادستی پر مبنی نظام سے نجات کی جدوجہد انسانیت کی معراج ہے. مشکلات، آزمائشوں اور امتحان کے مراحل میں جرآت و استقامت کا دامن مضبوطی سے پکڑا جائے اور کامیابی کا معیار یہ ہے کہ اللہ اور اُس کے پیغمبرِ اعظم (ص) کی اطاعت و اتباع کی جائے۔

(جاری ہے)

لیاقت بلوچ نے دربار میاں میر میں سالانہ عشرہ محرم الحرام بیاد شہدائے کربلا اتحادِ اُمت کانفرنس سے خطاب کیا اور سید مودودی (رح) میموریل میں اجلاس سے خطاب کرتے ہوئے کہا کہ ایران، امریکہ کے درمیان جنگ بندی، سوئٹزرلینڈ میں معاہدہ پر عملدرآمد کےلئے مذاکرات کا پہلا دور کامیاب رہا۔ اللہ تعالیٰ نے معرکہ حق کے بعد پاکستان کو عالمی سفارتی محاذ پر بھی قابل فخر کامیابی دی ہے.

عزت، وقار اور عالمی محاذ پر کامیابیاں تقاضا کررہی ہیں کہ ملک کے اندرونی حالات پر ایڈہاک ازم کی بنیاد پر توجہ دینے کی بجائے پوری سنجیدگی کیساتھ قومی تقاضوں کے مطابق مسائل کا حل نکالا جائے۔ آزاد جموں و کشمیر کی صورتِ حال، اندرون و بیرونِ ملک پریشانی کا باعث ہے. تحریکِ آزادی کشمیر کے بیس کیمپ میں اندرونی اضطراب اور بیرونی سازشوں کا حکمت و تدبّر کے ساتھ سدّباب کیا جائے.

مذاکرات اور مذاکرات ہی مسائل کا حل ہے. موجودہ حالات کے تناظر میں آزاد جموں و کشمیر میں مکمل غیرجانبدارانہ اور عوامی رائے کا احترام کیا جائے۔ آزاد کشمیر میں پی ٹی آئی کی رجسٹریشن کے لئے ہائی کورٹ کا فیصلہ خوش آئند ہے۔ جماعتِ اسلامی آزاد جموں و کشمیر انتخابات میں بھرپور حصہ لے رہی ہے۔ لیاقت بلوچ نے کہا کہ وزیراعظم میاں شہبازشریف اور اتحادی حکومت جتنا جلد اِس حقیقت کو تسلیم کرلیں کہ سول ملٹری اسٹیبلشمنٹ کی بالادستی اور سرپرستی میں قائم ہائبرڈ نظام ملک میں عدم استحکام کی جڑ ہے۔ ریاستی طاقت اور جبر سے امن، استحکام اور پائیدار ترقی ممکن نہیں.

آئین، قانون، آزاد عدلیہ، غیرجانبدارانہ انتخاب اور قومی وسائل کی منصفانہ تقسیم عوام کا حق ہے. بجلی، تیل، گیس پر حکومتی ٹیکسز، لیوی کا نفاذ عوام پر ناروا بوجھ ہے. ناقابلِ برداشت پیداواری لاگت، صنعت، زراعت، تجارت، گھریلو صنعت اور گھریلو صارفین کے لئے عذاب بن گیا ہے اور زندگی کا پہیہ جام ہورہا ہے. جماعتِ اسلامی معاشی اور آئینی جمہوری حقوق کے لئے ملک گیر جدوجہد جاری رکھے گی۔