پاکستان سمیت دنیا بھر میں کل منشیات کے ناجائز استعمال کے خلاف عالمی دن منایا جائے گا

جمعرات 25 جون 2026 14:58

پنگریو (اُردو پوائنٹ اخبارتازہ ترین - این این آئی۔ 25 جون2026ء) پاکستان سمیت دنیا بھر میں کل (26جون) منشیات کے ناجائز استعمال کے خلاف عالمی دن منایا جائے گا۔ اس دن کا مقصد منشیات کے بڑھتے ہوئے استعمال، اس کے تباہ کن اثرات اور نوجوان نسل کو درپیش خطرات کے حوالے سے عوام میں شعور و آگاہی پیدا کرنا ہے۔عالمی ادارہ صحت اور اقوام متحدہ کی رپورٹس کے مطابق دنیا بھر میں کروڑوں افراد مختلف اقسام کی منشیات استعمال کرتے ہیں، جبکہ ہر سال لاکھوں افراد نشے سے جڑی بیماریوں، ذہنی مسائل اور دیگر پیچیدگیوں کے باعث جان کی بازی ہار جاتے ہیں۔

ماہرین صحت کے مطابق آئس، ہیروئن، کوکین اور دیگر مصنوعی نشہ آور اشیا کا بڑھتا ہوا رجحان نوجوان نسل کے مستقبل، تعلیم، صحت اور معاشرتی زندگی کے لیے سنگین خطرہ بنتا جا رہا ہے۔

(جاری ہے)

ان کا کہنا ہے کہ منشیات کے استعمال سے نہ صرف جسمانی اور ذہنی صحت متاثر ہوتی ہے بلکہ جرائم، بے روزگاری، گھریلو تنازعات اور سماجی مسائل میں بھی اضافہ ہوتا ہے۔

ماہرین نے حکومتوں پر زور دیا ہے کہ نوجوانوں کو معیاری تعلیم، روزگار کے مواقع، کھیلوں اور مثبت سرگرمیوں کی فراہمی کے ذریعے منشیات سے دور رکھا جائے، جبکہ نشے کے عادی افراد کی بحالی اور علاج کے لیے موثر پروگرام متعارف کرائے جائیں۔پاکستان سمیت مختلف ممالک میں اس موقع پر سیمینارز، واکس، آگاہی مہمات اور خصوصی تقریبات کا انعقاد کیا جا رہا ہے۔ ماہرین اور سماجی کارکنوں کا کہنا ہے کہ منشیات کے خاتمے کے لیے والدین، تعلیمی اداروں، میڈیا، مذہبی و سماجی تنظیموں اور حکومتی اداروں کو مشترکہ کردار ادا کرنا ہوگا تاکہ نوجوان نسل کو ایک محفوظ اور روشن مستقبل فراہم کیا جا سکے۔