پاکستان کے کارپوریٹ سیکٹر نے مالیاتی سال 26-2025 میں ریکارڈ ترقی حاصل کر لی

اسلام آباد (اُردو پوائنٹ اخبارتازہ ترین - اے پی پی۔ 03 جولائی2026ء) سیکورٹیز اینڈ ایکسچینج کمیشن آف پاکستان نے مالیاتی سال 26-2025 میں 43,559 نئی کمپنیاں رجسٹرڈ کیں، جو پچھلے سال کی 35,087 کمپنیوں کے مقابلے میں سال بہ سال 24 فیصد اضافہ ظاہر کرتی ہیں۔ اس کے ساتھ ہی پاکستان میں رجسٹرڈ کمپنیوں کی کل تعداد 301,615 تک پہنچ گئی ہے۔ کمیشن نے جون 2026 میں 4,323 رجسٹریشنز کے ساتھ اب تک کی سب سے زیادہ ماہانہ رجسٹریشن کا ریکارڈ قائم کیا۔

یہ سنگ میل ایس ای سی پی کی ریگولیٹری اصلاحات، ڈیجیٹل تبدیلی، اور کاروبار میں آسانی فراہم کرنے کے عزم کی عکاسی کرتے ہیں، جس سے ایک متحرک اور شفاف کارپوریٹ ماحول قائم ہوا ہے جو کاروباری رجحان اور معاشی ترقی کو فروغ دے رہا ہے۔پبلک کمپنیوں میں 25 فیصد، پرائیویٹ کمپنیوں میں 27 فیصد، سنگل ممبر کمپنیوں میں 20 فیصد، اور لمیٹڈ لائبلٹی پارٹنرشپس میں 28 فیصد اضافہ ہوا، جبکہ سیکشن 42 کے تحت لائسنس یافتہ اور غیر ملکی کمپنیوں نے 5 فیصد ترقی درج کی۔

(جاری ہے)

صوبائی سطح پر، پنجاب نے پچھلے سال کی 18,198 رجسٹریشنز کے مقابلے میں 2025-26 میں 22,364 رجسٹریشنز ریکارڈ کیں، جس کے بعد اسلام آباد 7,117 کے مقابلے میں 8,340، سندھ 5,124 کے مقابلے میں 6,691، خیبر پختونخوا 3,130 کے مقابلے میں 3,820، گلگت بلتستان 961 کے مقابلے میں 1,585، اور بلوچستان 557 کے مقابلے میں 759 رجسٹریشنز کے ساتھ نمایاں رہے۔شعبہ جات کے لحاظ سے، آئی ٹی اور ای کامرس (8,700)، ٹریڈنگ (6,615)، سروسز (5,368)، رئیل اسٹیٹ اور کنسٹرکشن (4,042)، ٹورازم اور ٹرانسپورٹ (2,763)، فوڈ اینڈ بیوریجز (2,060)، ایجوکیشن (1,583)، مائننگ (1,051)، مارکیٹنگ (979)، اور ٹیکسٹائل (992) نئی کمپنیوں کی رجسٹریشن میں سرفہرست رہے۔

ان شعبوں نے مجموعی طور پر 34,153 کمپنیاں (کل کا 78 فیصد) رجسٹر کیں جن کی اوسط شرح نمو 27 فیصد رہی۔ ٹریڈنگ کے شعبے نے 41 فیصد کے ساتھ سب سے زیادہ ترقی ریکارڈ کی۔غیر ملکی سرمایہ کاروں کی شرکت بھی مضبوط رہی، جس میں 1,014 کمپنیاں رجسٹر ہوئیں جن میں 1,512 غیر ملکی شیئر ہولڈرز شامل تھے اور ان کا پیڈ اپ کیپیٹل تقریباً 2.5 ارب روپے رہا، جبکہ پچھلے سال 935 کمپنیاں، 1,334 شیئر ہولڈرز اور 2 ارب روپے کا سرمایہ ریکارڈ کیا گیا تھا۔

سال کے دوران بائیس (22) غیر ملکی کمپنیاں رجسٹرڈ ہوئیں۔ سرمایہ کاری کرنے والے اہم ممالک میں چین، افغانستان، امریکہ، برطانیہ، جرمنی، آسٹریلیا، نائیجیریا، کینیڈا، اسپین اور روس شامل ہیں۔ این بی ایف آئی سیکٹر میں غیر ملکی شرکت میں 85 فیصد کا اضافہ دیکھا گیا، جو پاکستان کی مالیاتی خدمات کی صنعت پر بڑھتے ہوئے اعتماد کا مظہر ہے۔کمپنیوں کی یہ ریکارڈ رجسٹریشن، علاقائی توسیع، بڑھتی ہوئی غیر ملکی سرمایہ کاری، اور شعبہ جاتی تنوع پاکستان کے کارپوریٹ سیکٹر کی پائیداری اور پختگی کو اجاگر کرتے ہیں، اور پائیدار معاشی ترقی کے لیے کاروبار دوست ماحول فراہم کرنے کے ایس ای سی پی کے عزم کا اعادہ کرتے ہیں۔